Москвадин 1245-нумрадин мектебда 6-классда кIелзавай Адам Нагъиевакай «ALONA» программадай ментальный арифметикадай кьиле фейи Вирироссиядин акъажунра чемпион хьана. Адаман буба Фарид Нагъиев Агъа СтIалдилай я, диде Замира Нагъиева – Мегьарамдхуьряй. Чаз чир хьайивал, ам Дагъустандин халкьдин шаир Фейзудин Нагъиеван хтул я. Хци кьатIунар авай Адам гьисабунрай фад-фад кьил акъудиз вердиш хьанва. Ам ментальный арифметикадал машгъул жез ругуд йис я.
Адаман агалкьун себеб яз, вири халкьарин «ALONA» программадин векилдин патай адан классдин регьбер Е.Массаловадив ва мектебдин директор И.Масловадив чухсагъулдин чарар агакьна.
«2017-йисуз диде-бубади зун сад лагьай махсус тарсуниз тухвана. Заз четин аквазвай, амма итижлуни тир. Зун мадни кIевелай машгъул хьана. Кьве вацралай Москвада ментальный арифметикадай зи сад лагьай акъажунар гатIунна. За и макъам сабурсуздаказ вилив хуьзвай. А чIавуз за 3-чка кьунай. 2018-йисан июлдиз за Москвада вири халкьарин акъажунра иштиракна ва 1-чка (ганвай 70 пример гьялунай) кьуна», – ихтилатна заз Адама.
Гуьгъуьнин йисара ада Грозныйда ва маса чкайра ментальный арифметикадай агалкьунралди иштиракна. Машгьур конкурсда хьанвай агалкьун мубаракуналди, чна Адамаз идалай кьулухъни еке дережаяр муьтIуьгъарун алхишзава.
Куругъли Ферзалиев
