25-майдиз «Лезги газетдин» редакцияда, 7-мертебада, шад мярекат кьиле фена: сифтени — сифте муаллим, къелемдин дуст, шаир, гьикаятчи, публицист, критик, таржумачи, «ЛГ-дин» литератарадин ва культурадин отделдин редактор Мердали Жалилован 80 йисан юбилей шад гьалара къейдна.
Редакциядин коллективдилай гъейри, мярекатда гзаф йисара адахъ галаз дуствилин алакъаяр хуьзвай ксари — багьа мугьманрини иштиракна. Абурун арада Дагъустандин Верхсуддин судья, юстициядин генерал-лейтенант Зияд Седрединов, Дагъустандин ветеранрин Советдин председатель Мегьарам Алижанов, «Защитник Отечества» СООД-дин, генерал-полковник М.Танкаеван тIварунихъ галай фондунин председатель, РД-дин информациядин ва печатдин Агентстводин патав гвай ОС-дин председателдин заместитель Гьасангьуьсейн Абдулжелилов, Чернобылдин авариядин чIуру нетижаяр арадай акъудунин карда активнидаказ иштиракай чи ватанэгьли, фияви полковник Нисрет Исмаилов, афгъанви Физавудин Шагьпазов, «Дагъустандин дишегьли» журналдин лезги выпускдин редактор Наира Шихнебиева ва масабур авай.
Машгьур алим, «Гъепцегь-наме» ктабрин автор Мукаил Изберович Мукаилова юбиляр гьеле пакам кьиляй ихьтин цIараралди тебрикна:
Инсанриз вуна авуна гьикьван хъсанвал!
Абурун сан чи Лезгистанда чизава.
Садрани вуна квадарайд туш Инсанвал —
Кхьиниз лайихлу я ви тIвар «Яру Ктабда»!
Дугъриданни, кхьидай себебар тIимил авач. Дагъустандин виридалайни кьакьан Шалбуз дагъдин, Базардуьзидинни Ярудагъдин гуьзел тIебиатдин къужахда, авай Миграгъа Ватандин ЧIехи дяведин иштиракчи Абдулазизан ва мецин яратмишунар дериндай чидай, абур несилрив агакьарун патал вейи Угълангерекан хизанда дидедиз хьайи Мердали Жалилов зурба руьгь авай, мягькем виждандин сагьиб гьавиляйни я жеди.
Юбилейдин мярекат агъсакъал, газетдин жавабдар секретарь Шихмурад Шихмурадова ачухна ва кьилени тухвана.
— Советрин мектебди, гьукуматди вилик пара важиблу, жавабдар везифа эцигнавай: вири патарихъай виликди фенвай, кIелунрал, зегьметдал рикI алай Инсан тербияламишун. И везифа агалкьунралди кьилизни акъудзавай. Чи гьуьрметлу юбиляр фенвай рекьи, адан чешнеди и кар тестикьарзава. Армиядани, ахпа вузда кIелдайлани, ам отличник хьана. Мектебра муаллим яз, ада дерин чирвилер ва лап хъсан тербия гана. Къецепатан кIвалахдин тешкилатчи яз, школьникар тIебиат, Самурдин там хуьнал руьгьламишна. Тамара цIийи къелемар кутунин адан тежриба газетрайни раиж авурди я, — къейдна ада. — Кьисметди чун кьведни «Коммунист» («Лезги газет») газетдин редакциядиз акъудна. Литературадин отделдин редактор яз, Мердали Жалилова газетдин кIвалахдик еке пай кутазва. Газетда санал кIвалахзавайбурузни, газет кIелзавайбурузни къелемдин чи дустуни адал абур гъизвайди чида. Виликамаз гьазурна, гьар са нумрадиз 3-4 чин сифтени- сифте вахкузвай кас гьам я. Кхьизвай шейэрни — халкьди хушдиз кьабулзавайбур, кIелзавайбур.
Къенин юкъуз чна адаз агакьнавай дережаяр — 80 йисан юбилей вири коллективдин, газет кIелзавайбурун, вири лезги халкьдин патай тебрикзава:
Мубаракрай, дуст, юбилей ваз!
Гила 90 ва 100 йисариз це на заказ!..
Мердали Жалиловакай куьрелди лугьуз хьун четин я. Эхь, 80 йис-им баркаллу юбилей, уьмуьрда кьилиз акъуднавай кIвалахрин нетижа кьадай вахтни я. Къенин юкъуз, лезги эдебиятдин лап сейлибурукайни ферлибурукай, вичин кхьинралди кIелзавайбурун руьгь тухарзавайбурукай сад яз, Мердали Жалилова санлай вири уьлкведин, кьилди чи халкьдин тарихдиз, кар алай вакъиайриз гузвай къиметар, несилриз ийизвай тагькимарунарни тазвай весиятар, адан инсанвилин виниз тир ерияр къейд авунихъ авунихъ галаз сад хьиз, къазанмишнавай агалкьунар, нетижаяр, алакьунар, бажарагълувал фикирда кьуна, и юкъуз тебрикдин чими келимайрилай гъейри, адав лайихлу шабагьарни агакьна.
— КIвалахдихъ, къуллугъдихъ галаз алакъалу яз, Ватандивай яргъа хьайи йисар квачиз, за «Лезги газет» кхьизва, кIелзава. Мердали Жалилова газетдик кутазвай пай чаз гьар садаз хъсандиз аквазва. Къе чна шадвалзава «Лезги газет» амай вири халкьарин газетрилай пара тираж аваз акъатунал. И кардик чи юбилярдин лайихлу пайни ква. Къуй квехъ, Мердали стха, чандин сагъвал, хизанда хушбахтлувал хьурай! — алхишна мугьманрикай сифте гаф гайи Мегьарам Рамалдановича. — Ада юбилярдив Дагъустан Республикадин ветеранрин гьерекатда активнидаказ иштиракунай медаль вахкана.
Газетдин литературадин отделдин редактор яз, М.Жалилован кIвалах, ада гьар нумрада кIелдайбурув агакьарзавай «Веревирдер» кьетIендаказ къейд авуналди, тебрикдин чими келимаяр Нисрет Исмаиловани лагьана.
Гуьгъуьнлай Мердали Абдулазизовичаз юбилей Гьасангьуьсейн Абдулжелилова тебрикна. Гзаф миллетрикай ибарат тир Дагъустандин культурадин ирс, СМИ, Дагъларин уьлкведин шиират, литература вилик тухуник, дидед чIал хуьник, республикадин халкьарин арада дуствал мягькемаруник, жегьилар ватанпересвилин руьгьдаллаз тербияламишуник лайихлу пай кутунай, гзаф йисарин яратмишунринни гьакъисагъ зегьметдай, общественный уьмуьрда активнидаказ иштиракунай юбилярдив «Честь и гордость Дагестана — Золотой орел» орден вахкана.
«Лезги газетдин» кьилин редактордин заместитель Куругъли Ферзалиева юбилярди газетдин кIвалахдик лайихлу пай кутазвайдакай тебрикдин чими келимаяр лагьана, агъсакъалдив «Лезги газетдин» 100 йисан юбилейдин медаль вахкана.
Мердали Жалилов мадни еке шабагьар гуниз лайихлу я. 7-мертебеда чи кабинетар сад-садан патав гва. Чизвайвиляй, акурвиляй за лугьузва: чи халкьдин векилри, гъилелди кхьенвай шейэр кIелиз, хатIарай кьил акъудиз, абур газетда, гьакIни кьилдин ктабар яз чап ийиз Мердали Абдулазизовича гзафбуруз куьмекар гана, гузва. Адан гъиликай хкатнавай кьван ктабар гьисабна куьтягь жедач. Сагърай вич! Ада литотделдиз регьбервал гузвай йисара майдандиз гьикьван цIийи тIварар акъуднатIа, халкьдин дерин къатариз раижнатIа лугьуз хьун четин я. Эхь, Мердали Жалилов гзаф крара чаз чешне, чи маяк я.
Чна вирида екез гьуьрметзавай Мердали Абдулазизович, къуй квехъ чандин сагъвал, хизанда мадни хушбахтлувал хьурай! Аллагьди Куь рикIин ва вилерин ишигъ датIана хуьрай!
Рагнеда Рамалданова
