Алатай асирдин 70-80-йисара комсомолдин организацийри жегьилар тербияламишуниз, азад вахт хийирлудаказ тухуниз, спортдин мярекатар тешкилуниз кьетIен фикир гузвай. Абуру сиягьатар, концертар, викторинаяр, конкурсар, дяведин ветеранрихъ, машгьур шаиррихъ, спортсменрихъ, производстводин кIвенкIвечийрихъ галаз гуьруьшар тухун адетдиз элкъвенвай.
Гьа ихьтин са мярекатдикай — 1988-йисуз “Зардиянский” совхоздин комсомолар Кьурагь райондин малдаррихъ галаз гуьруьш хьайивиликай писатель Абдулбари Магьмудован “ЦIийи Макьар” ктабда суьгьбетзава.
А гуьруьшдиз талукь макъаладай са чIук заз газет кIелзавайбурун фикирдиз гъиз кIанзава.
“…Гатфар ятIани Кьурагьа кьуд пад гьеле живеди кIевирнамай, ракъинин ишигъ кватнавай. Райондин культурадин дворецдин вилик “Курахский” совхоздин парткомдин секретарь С.Эмиргьамзаев, хуьруьн Советдин председатель А.Эмирбегов, совхоздин комсомолдин комитетдин секретарь И.Малаалиева, райондин культурадин отделдин зеведующий А.Эмиргьамзаева ва хуьруьн са десте жегьилар “Зардиянский” совхоздин жегьилрин делегация гуьзлемишиз акъвазнавай. Нисинин вахт. Къунши райондай атанвай мугьманар ва чкадин жегьилар хуьруьн майдандал, В.И.Ленинан памятникдал фена, анал цуьквер эцигна.
Нисинилай кьулухъ делегациядин членар “Курахский” совхоздин Ашарин отделенида авай комсомолринни жегьилрин малдарвилин фермадиз фена. Чи делегациядин член, “Зардиянский” совхоздин старший зоотехник Рамазанов Нежведин ва доярка Саидова Жанисат фермадин жегьил малдаррин кIвалахдихъ галаз таниш хьана. “Зардиянский” совхоздин комсомолдин комитетдин секретарь Магьмудов Мизамудинани “Курахский” совхоздин комсомолдин комитетдин секретарь Малаалиева Индижата малдаррин яшайишдин ва жегьилар малдарвилел желбунин месэлайрикай рахунар авуна. Инал абур кьве совхоздин жегьил дояркайри сада-садаз соцсоревнованидиз эвер гунин меслятдал атана ва и кIвалахни кьилиз акъудна. ГьакI Ж.Саидова Кьурагьрин кIвенкIвечи доярка Гьалимова Эгистанан тежрибадихъ галаз таниш хьана.
Няниз райондин культурадин дворецда дагълара советрин къурулушар арадал гъунин карда активвилелди иштиракай ва душманри яна, кьейи викIегь хва Рустамханов Салман рикIел хкуниз бахшнавай межлис кьиле фена. И шад мярекатдал РАПО-дин советдин председатель Абудин Султанова ва Абдулбари Магьмудова жегьилриз Салманан уьмуьрдикай суьгьбетна. Гуьгъуьнлай партиядин Кьурагь райкомдин секретарь Ф.Бабаевади райондин зегьметчийри къазанмишай агалкьунрикай, М.Магьмудова партийный организациядин руководстводик кваз хуьруьн жегьилри ЧIехи Октябрдин 70 йисан юбилей зегьметда ва общественный уьмуьрда агалкьунар аваз къаршиламишзавайдакай ихтилатна”.
Хазран Кьасумов
