И йикъара Мегьарамдхуьруьн 2-нумрадин ДЮСШ-да, райондин югъ къейд авунин сергьятра аваз, Абрек Гьажиеван экуь къаматдиз бахшна волейболдай итимрин командайрин арада райондин ачух чемпионат кьиле фена. Идакай чаз муниципалитетдин пресс-къуллугъди хабар гана. Чемпионат ачухуниз талукьарнавай мярекатда райондин кьил Ф. Агьмедова спортдин серенжемдин тешкилатчийриз, гьа гьисабдай яз А.Гьажиеван стха Мавзидин Играмудиновичаз сагърай лагьана.
Къизгъин къугъунрин нетижада 1-чкадиз Кьурагь райондин команда лайихлу хьана. СтIал Сулейманан ва Мегьарамдхуьруьн районрин командайри 2 ва 3-чкаяр кьуна.
КIвенкIвечи чкаяр кьур командайриз медалар, грамотаяр ва пулдин пишкешар гана. Тафаватлу хьайи спортсменрин жергедай яз Саид Шагьмарданов (виридалайни хъсан къугъвадайди, Кьурагь райондин команда) ва Мурсал Мегьтиханов (виридалайни хъсан гьужумдайди, СтIал Сулейманан райондин команда) рикIел аламукьдай пишкешар гуналди къейдна.
Чи мухбир
