Кьурагь райондин КьепIиррин хуьре цIийи багъ (парк) арадал гъиз гатIуннава. Ана 150-дав агакьна къелемар цадайвал я.

И баркаллу кар гъиле кьунвайбур ва проектдиз пулдин такьатар чара ийизвайбур кьепIирвияр тир Артур ва Рашид Алимовар я. Багъ арадал гъун «Абад КьепIир» фондуни тешкилзава. Къейд ийин хьи, фондуни и хуьруьн агьалийри, чпин мумкинвилериз килигна, гуьгьуьллудаказ гьар вацра гузвай пулдин такьатарни кIватIзава.

Тамам тушир пуд йисан къене «Абад КьепIир» фондуни 30-дав агакьна жуьреба-жуьре проектар кьилиз акъуднава. Мисал яз, спортзал, мискIин тамамдиз ремонт авун, хуьруьн аялриз спортдал машгъул жедайла герек къведай шейэр ва мектебда хийир къачудай затIар къачун, спортсменар патарал спортдин акъажунриз финн тешкилун, гимнастикадин ва силовой тренажерар галай спортдин са шумуд майдан туькIуьрун, са жерге спортдин мярекатар кьиле тухун, игьтияж авай хуьруьнвийриз сагъламвал мягькемар хъувун патал пулдин куьмек гун, хуьруьн мулкарал са жерге булахар эцигун, ремонт хъувун, сурара михьивилер авун ва хейлин маса сернежемар…

«Абад КьепIир» фондунин активди чпи ийизвай кIвалахар чи ватаэгьлияр патал чешне жедайдак ва абурни хайи хуьрера вири халкь патал хийир авай кIвалахар ийиз эгечIдайдак умудар кутазва. Анжах сад хьайила чавай вири четинвилериз арадай акъудиз жеда!

 

Чи мухбир