Лезгийрин уьмуьрда Яран Сувари къадим девиррилай эгечlна кьетlен чка кьазва. Виринра хьиз, халкьдин рикl алай сувар Докъузпара райондин Мискискарин хуьрени гурлудаказ къейдна.
Къе, 20-мартдин гуьлуьшан юкъуз, Мискискарин хуьруьн центрда шадвилин сувар къейдун патал тешкиллудаказ гьазурвал акунвай. Мярекатар вижевайдаказ тешкилуник райондин медениятдин управлениди, Мискискар хуьруьн администрациядин кьил Шафидин Магьарамова, райондин спортдин, жегьилрин сиясатдин ва туризмдин рекьяй отделдин начальник Агъашериф Агъаширинова, Мискискарин хуьруьн медениятдин кlвалин директор Бренбег Абдуллаева ва масабуру чпин пай кутунвай.
Майдан шадвилин гьиссер квай агьалийрив, мугьманрив ацlанвай. Анал авунвай цlаяри, пагьливанрин дестеди, лезги авазри сувариз хас гьакъикъи шикил арадиз гъанвай.
Райондин медениятдин управленидин музыкадин устадри, гьа жергедай яз «Шалбуздагъ» ансамблдини тамамарзавай манийри, авазри кlватl хьанвайбурун гуьгьуьлар шадарзавай.
Мярекат хуьруьн медениятдин макандин директор Абдуллаев Бренбега тебрикдин хуш келимайралди ачухна. Сифте гаф Мискискарин хуьруьн администрациядин кьил Ш.Магьарамоваз гана. Ада виридаз райондин администрациядин ва вичин патай сувар мубаракна, алхишдин келимаяр лагьана. Тебрикдин гафар хуьруьн агъсакъалрин советдин председатель Мурад Магьарамова, агъсакъалар тир Хейбар Айдаева, Манкъули Курчиева, муаллим Гьафиз Гьафизова, Каракуьре хуьруьн администрациядин кьил Нуруллагь Гуьлагьмедова лагьана. Абуру суварин тарихдикай, адан кьетlенвилерикай ихтилатна.
Яран Суварин сергьятра аваз гьар йисуз спортдин милли жуьрейрайни акъажунар кьиле физва. Цlинин йисуз къван гадарунай, алай чкадилай хкадарунай ва гиря хкажунай кьиле фейи акъажунра хейлин пагьливанри чпин алакьунар къалурна.
Акъажунрин нетижада къван гадарунай 1-чка Элмадин Ибрагьимова (Махачкъала), 2-чка Мевлан Акберова (Мискискар), 3-чка Нажмудин Мусабегова (Цlийикаракуьре) кьуна; алай чкадилай хкадарунай 1-чка Абдурагьман Жамиева (Цlийикаракуьре), 2-чка Тельман Рамалданова (Цlийикаракуьре), 3-чка Элмадин Ибрагьимова (Махачкъала) кьуна; гиря хкажунай 1-чка Элмадин Ибрагьимова (Махачкъала), 2-чка Эмин Ибрагьимова (Мискискар), 3-чка Багьадин Алиева (Мискискар) кьуна.
Гъалиб хьайибуруз ва приздин чкаяр кьурбуруз райондин администрациядин патай А. Агъаширинова дипломар ва пулдин пишкешар гана.
Мярекатрин сергьяра аваз агьалийриз виликамаз ганвай Яран Суварин лотереядин билетарни къугъвана. Агьалийриз билетрай гзаф кьадарда жуьреба-жуьре пишкешар (къаб-къажах, уьтуьяр, термосар, мобильный телефонар ва хейлин маса къиметлу затlар) акъатна.
Къуй лезги чилел гьамиша асайишвални берекатлувал, шадвални сувар хьурай!
Куругъли Къалажухви
