Эхиримжи зенгинин сувар, вири уьлкведа хьиз, Ахцегь райондин школайрани гурлудаказ къейдна.

Шад мярекатар, адет тирвал, митингрилай эгечI­на. Мугьманри, школайрин администрацийри, муаллимри, школа акьалтIарза­вай жегьил-жаванри ва абурун диде-бубайри тебрикринни чухсагъулрин хуш келимаяр лагьана, цавуз шарар ахъайна, сада-садаз цуькверни рикIел аламукьдай пишкешар гана. Эхиримжи зенгер ягъун сифте яз школайриз атанвай бицIекрал тапшурмишна.

2019-йисуз чи уьлкведа 647 агъзур жегьилди юкьван чирви­лерин мектебар, яни 11-класс ва 1 млн 041 агъзур школьник­ди 9-класс акьалтIарна, чIехи ва жавабдар уьмуьрдиз кам вегьезва. Ахцегь райондай  191 жегьилди — 11, 282 — да 9-классар акьал­тIарзава. Абур патал им имтигьанар вахкунив эгечIзавай виридалайни­ четин ва жавабдар вахт я. И уламдай абурувай лайихлувилелди экъечIиз жедайдак умуд кутазва.

“Ахцегь район” муниципалитетдин кьил Осман Абдулкери­мов и сеферда вичин заместитель Алмас Шуаев, райондин де­путатрин собранидин председатель Абдул-Керим Палчаев ва УО-дин начальник Ал­мас Гьажиевни галаз КьакIарин хуьруьн школадиз мугь­ман хьана. Абур школадин администрация­дин кIва­лахдилай рази яз амукьна. Ахпа ада шадвилин линейкадал аялриз, абурун диде-бубайризни муаллимриз эхиримжи зенгинин сувар мубаракна, выпускникриз хуш келимаяр­ лагьана ва вилик квай имтигьанарни абурувай агалкьунралди вахкуз, вузрикни колледжрик экечIна, хкянавай пешейрай чирвилер­ къачуз жедайдак умуд кутуна. “Са карни асант­диз ара­диз къвез­вач, къаст эцигна, алахъна кIанда. Гьина ва гьи кар-кес­пи­дин ие­си хьайитIани, хайи школа, хуьр, район, тарс-тербия гайи­ ди­де-бубани муаллимар ри­кIелай алудмир”, — лагьана Осман Магьмудовича.

Несигьатрин келимаяр адахъ галаз атанвайбуруни, муаллимри ва аялрин диде-бубайрини лагьана.

Эхиримжи зенгинин линейкаярни шадвилер райондин вири хуьрерин школайра тешкиллувилелди кьиле фена. Гила имтигьанар вахкунив эгечIнава. Хуш се­фер хьурай!

Дашдемир Шерифалиев