Дагъустандин здравоохраненидин министерстводиз коронавирусдихъ галаз женг тухун патал федеральный бюджетдай 842 миллион манат пул ахъайнава. Идакай ТАСС-ди хабар гузва.
Чешмедин делилралди, такьатар тIугъвал акатнавай азарлубур кьабулзавай азарханайра койкаяр кислороддалди таъминаруниз, азарлубурухъ гелкъвезвай, абурухъ галаз алакъада жезвай духтурриз тIугъвалдикай хуьдай махсус парталар, медицинадин тадаракар, гьа жергедай яз, компьютердин томографдин цIийи аппарат маса къачуниз харжда.
РД-дин здравоохраненидин министерстводин пресс-къуллугъди хабар гузвайвал, пулдин такьатар азарханайрин арада пайнава. Республикадин инфекцийрин азаррин центр патал цIийи компьютердин томограф маса къачуда. Чара авунвай такьатрихъ вахтунда герек тир тадаракар маса къачунин жигьетдай жавабдарвал кьилин духтуррин хиве тунва.
«Лезги газет»
