И йикъара Махачкъалада, Росгвардиядин Дагъустанда авай Управление арадал атана 8 йис тамам хьуниз талукьарна, шад мярекатар кьиле фена. Анра региондин Управленидин начальник, генерал-майор Александр Орехова, Дагъустандин Гьукуматдин Председателдин заместитель, генерал-майор Рамазан Жафарова, РД-дин къенепатан крарин министр, генерал-лейтенант Абдурашид Мегьамедова, Россиядин РД-да авай УФСБ-дин начальник, генерал-майор Геннадий Анацкийди, къуллугъдин ветеранри, Росгвардиядин профилдин классда кIелзавай аялри ва тероргандин личный составди иштиракна.
Шадвилин мярекатар башламишдалди вилик кIватI хьанвайбуру, къуллугъдин везифаяр кьилиз акъуддайла, телеф хьанвай омоновчийриз Росгвардиядин Дагъустан Республикада авай Управленидин ОМОН-дин «Горец» базада хкажнавай мемориалдал цуьквер эцигна, са декьикьада кисна акъвазуналди, абурун экуь къаматар рикIел хкана.
Мярекат ачухай генерал-майор Александр Орехова алатнавай йисарани, къенин юкъузни ина къуллугъзавай ксари, халис пешекарвал ва Ватандин вилик вафалувал къалуруналди, чпин хиве авай везифаяр намуслудаказ кьилиз акъудзавайди къейд авунихъ галаз сад хьиз, Росгвардиядин Дагъустанда авай Управлениди 2024-йисан алатнавай варцара 3 агъзурдалай виниз тапшуругъар (задачи) кьилиз акъуднавайди раижна. Кьилди къачуртIа, къанун-къайда хуьдай амай органрихъ галаз санал республикадин мулкарал кьиле тухвай жемиятдинни сиясатдин, медениятдин, спортдин, диндин рекьерай общественный къайдаяр хуьнин ва агьалийрин хатасузвал таъминарунин крара агалкьунралди иштиракна. Идалайни гъейри, Россиядин ФСБ-дин Дагъустанда авай сергьятар хуьдайбурун Управленидихъ галаз санал Каспий гьуьле, Терек ва Сулак вацIара законсуздаказ анрин ресурсар чуьнуьхзавайбурухъ галаз женг чIугунихъ элкъуьрнавай серенжемар кьилиз акъудна. Терорган арадал атай ва Росгвардиядин спецназдин къуватрин югъ тебрик авунихъ галаз алакъалу яз, ада къуллугъчийрив чими келимаяр агакьарна, яргъал уьмуьр, чандин сагъвал, къуллугъдинни женгинин везифаяр кьилиз акъудунин четин кIвалахда агалкьунар хьун алхишна.
Дагъустандин Кьил Сергей Меликован тIварунихъай Росгвардиядин къуллугъчийриз генерал-майор Рамазан Жафарова сувар тебрикна. Къанун-къайда хуьдай къурулушда ам арадал атай чIавалай кьулухъ Росгвардиядин къуллугъчияр государстводин ва жемиятдин хатасузвал таъминарунин, конституциядин ихтиярар ва азадвал хуьнин месэлайрал активнидаказ машгъул тирди къейдна. Генерал-майорди абуруз гьакIни республикада къанун-къайда хуьнин ва хатасузвал таъминарунин рекьерай виниз тир пешекарвал къалуруналди кьилиз акъуднавай кIвалахдай, жуьрэтлувиляй сагърай лагьана.
Росгвардиядин региондин Управленидин къуллугъчийрин тIварунихъ чими келимаяр амай мугьманрини лагьана. Шад мярекатдин сергьятра аваз, чпин везифаяр намуслудаказ кьилиз акъудзавай къуллугъчияр государстводин ва ведомстводин шабагьар, чухсагъулдин чарар ва къиметлу пишкешар гуналди къейдна. Росгвардиядин профилдин классда кIелзавай аялар А. Орехован къул алаз Чухсагъулдин чарариз лайихлу хьана.
Рагнеда Рамалданова
