Дагъустандин Яшайишдин фондунай алай йисан алатнавай варцара дагъустанви 26 агъзурдалай виниз дишегьлийри аялар хунин гьакъиндай (родовой) сертификатрай медицинадин идарайрив 274 миллион манатдилай виниз пул агакьнава. Къенин юкъуз сертификатдин кьадарди 12 агъзур манат тешкилзава.
РикIел хкин: сертификатдин пул гъиле вугузвач. Ам кIвачел залан тир дишегьлиди хкянавай медицинадин идарадин лицевой счётдиз рекье твазва. ИкI, дишегьли кIвачел залан хьунихъ ва аял хунихъ галаз алакъалу яз гузвай сертификатди ам кIвачел залан тирла ва аял хайидалай кьулухъни духтуррин гуьзчивилик жедай медицинадин идара вичин рикIиз кIандайди хкядай мумкинвал гузва.
Санлай уьлкведа хьиз, чи региондани и сертификат электронный жуьрединди тайинарзава. Ам «кьетIен» гьалда авай дишегьли вич яшамиш жезвай чкада сифте сефер яз дишегьлийрин консультациядиз фейила, аялар хадай кIвале ва я аял гуьзчивилик жедай поликлиникада туькIуьрзава. И къайдадин сертификатдал элячIуни дишегьлияр патал кIвалах кьезиларнава. Виликдай сертификатдин бланк медицинадин идарадиз дишегьлиди вичи гъана, аял хадалди ам гваз къекъвена, аял хайидалай кьулухъ дишегьлийрин консультациядив, аялдин поликлиникадив, Яшайишдин фондунив делилар агакьарна кIанзавай. Гила лазим тир вири делилар Яшайишдин фондунив чеб чпелай агакьзава, анай — медицинадин идарайривни. Ахьтинбурук дишегьли кIвачел залан хьунихъ галаз алакъалу яз учётда акъвазай вахт, аял хуниз талукь ва икI мад делилар акатзава. Электронный къайдадин сертификатди медицинадин къуллугъчийриз ам ацIурунин кIвалахни кьезиларнава.
И ва я маса месэладин патахъай суалар пайда хьайи чIавуз, квевай Россиядин Яшайишдин фондунин Дагъустанда авай отделенидин алакъадин центрадиз, пакаман сятдин 9-далай нянин сятдин 6-далди зенгна (телефон: 8-800-200-03-39, зенг пулсузди я), абуруз жавабар жагъуриз жеда.
«Лезги газет»
