Дагъустандин Яшайишдин фондунин пресс-къуллугъди малумарзавайвал, 1-апрелдилай уьлкведа яшайишдин пенсия 7,5 процентдин хкажда. Дагъустанда и пенсия 120 агъзурдалай виниз агьалийри къачузва.
«Яшайишдин пенсия и ва я маса себебралди яшлувилихъ галаз алакъалу яз тайинарзавай страховой пенсия къачун тийизвайбуруз гузва. Идалайни гъейри, и пенсия етимриз, инвалидвал авай агьалийриз, гьа гьисабдай яз аялризни, диде-буба кьилелай алатнавайбурузни, яшарилай аслу тушиз, тайинарзава. Амма адан кьадар инвалидвилин группадилай ва региондин коэффициентдилай аслу я», — хабар гузва Дагъустандин Яшайишдин фондунин управляющийдин везифаяр тамамарзавай Мегьамед Исаева.
Малуматда мадни къейдзавайвал, пенсия 7,5 процентдин хкаждайбурун жергедик акатзава: пенсиядиз экъечIнавай военный рекьяй къуллугъчияр, Ватандин ЧIехи дяведин иштиракчияр, «Жителю блокадного Ленинграда» знак ганвай ксар, радиациядикди зарар хьайибур, военный рекьяй къуллугъчийрин ва Чернобылдин вакъиайра телеф хьайи хизанрин зегьмет чIугваз тежезвай членар, гуьгьуьллубурун кIватIалрик кваз Ватан хуьзвай ксар.
ИкI, индексация кьиле тухвайдалай кьулухъ Дагъустанда яшайишдин пенсиядин юкьван гьисабдин кьадарди 7 689 манат тешкилда. Гьа са вахтунда инвалид аялрин пенсиядин кьадар 18 453 манатдив агакьда.
«Лезги газет»
