Алай йисуз Дагъустандай тир 550-далай гзаф дишегьлияр пенсиядиз фад экъечIна. Ахьтинбурук, яни пенсиядиз фад экъечIдай ихтияр авайбурук, 3 ва адалай гзаф аялар ханвай ва чпихъ 15 йисалай тIимил тушиз йисарин страховой стаж ва пенсиядин 28,2 коэффициент (2024-йисуз, 2025-йисузни 30-далай тIимил тушиз) авай дишегьлияр акатзава.
РикIел хкин, эгер лазим кьадар йисарин страховой стаж аваз хьайитIа, 5 ва адалай виниз аялар ханвай ва 8 йисал къведалди абуруз тербия ганвай дишегьлияр 50 йис тамам хьайила пенсиядиз экъечIзава. 4 аял авай, 56 йис хьанвай ва 3 аял авай дидейризни, 57 йис тамам хьайила, пенсиядиз фад экъечIдай мумкинвал ава.
Ибурулай гъейри, страховой пенсия фад къачудай мумкинвал авайбурук аял рушвиле ва я хвавиле кьабулнавай дидеярни акатзава. Мадни — инвалидвал авай аялдихъ гелкъвезвай дидедиз ва я бубадиз ихьтин ихтияр ава. Кьилди къачуртIа, эгер 15 йисалай тIимил тушиз йисарин страховой стаж аваз хьайитIа, диде, 50 йис тамам хьайила, пенсиядиз экъечIда. Бубадиз — 55 йис тамам хьайила, амма адахъ 20 йисалай тIимил тушиз страховой стаж хьун лазим я.
Дидевилин ихтияррикай магьрумнавай дидейриз пенсия, умуми къайдайрал бинеламиш хьанваз, тайинарда.
Пенсия виликамаз тайинарун патал арза, «Госкъуллугъар» порталдикай менфят къачуналди, МФЦ-диз ва я республикада авай Яшайишдин фондунин отделенийрин муьштерийрихъ галаз кIвалахдай къуллугъриз фенани гуз жеда.
Рагнеда Рамалданова
