И йикъара Махачкъалада, Дагъустандин писателрин Союздин мярекатрин кIвале яратмишунардайбурун “Булах” кIватIал арадал гъайи бажарагълу шаир, педагогикадин илимрин кандидат Гуьзеля Гьасановадин эсеррин цIийи кIватIалдин презентация кьиле фена. Къейд ийин, 2016-йисуз арадал гъанвай “Булах” кIватIалдин кьилин макьсад жуван хайи маканривай яргъа яшамиш жезвай, яратмишунардай тах квай ксарин бажарагъ винел акъудун, абур вилик тухун, эсеррин кIватIалар чапдай акъудун, чи эдебиятдиз талукь гьар жуьре мярекатар тешкилун я.
“Гьиссерин алемда” ктаб кIелзавайбуруз раиж авунин мярекатдиз гзаф мугьманар атанвай — “Булах” кIватIалдин бязи векилар, автордин яратмишунрихъ галаз таниш, абурал рикI алай ксар, Г. Гьасановадин ярар-дустар, мукьва-кьилияр. Абуру автордиз цIийи ктаб акъатун тебрикна, цуьквер гана, шиирар кIелна.
Мярекат Дагъустандин писателрин Союздин лезги секциядин руководитель Владик Батманова Гуьзеля Гьасановадикай куьруь делилар раиж авунилай башламишна.
ЦIийи ктабдин редактор ва адаз сифте гаф кхьенвай автор, “Лезги газетдин” политикадин отделдин редактор Нариман Ибрагьимова шаирдин яратмишунрин кьетIенвилерикай, чпин танишвиликай суьгьбетна. Ам гьакIни кьве йисан вахтунда сад тир къуватралди “Булах” тешкилатди чапдай акъуднавай ктабрикайни рахана.
Тагьирхуьруьн-Къазмайрин школада кIелдай чIавуз Гуьзелядиз тарсар гайи, къе “Лезги газетдин” литературадин отделдин редактор тир Мердали Жалилова вичин ученицадиз нубатдин ктаб мубаракна. Ада кIелай вахтар, гьеле мектебда амаз адахъ аваз хьайи кьатIунар, алакьунар, бажарагъ рикIел хкана. Устадвал хкажунин жигьетдай бязи теклифар гана.
Мярекатдал МЛНКА-дин председатель Пакизат Рагьимханова, кьуьчхуьрви шаир Фазил Асланов, манидарар Тамила Хидирова, Дильмира Ашурбегова, лезгийрин бажарагълу тележурналист ва режиссёр Гуьлера Камилова, Г.Гьасановадин ктаб чапнавай “Мавел” карханадин регьбер Мегьамед Магьмудов ва масабур рахана. Абуру “Гьиссерин алемдин” кьетIенвилерикай, автордин инсанвилин, шаирвилин, пешекарвилин ерийрикай хуш келимаяр лагьана.
Эхирдай Гуьзеля Гьасановади атанвай мугьманриз сагърай лагьана, шиирар кIелна ва ктабар багъишна, санал шикилар яна.
Дагъви Шериф
