Эхиримжи йисара Сулейман-Стальский районда общественный дараматар, жуьреба-жуьре объектар эцигзава. Абурукай виридалайни чIехиди ва метлеб авайди, гьелбетда, “Сардаркент-Даркуш-Казмаляр” водопроводдин проект я. Ам 1992-йисуз “Даггипроводхоз” институтди туькIуьрнай. Метлеб райондин агьалийрин 60 процент (40000 кас) хъвадай целди таъминарун тир. Идалайни гъейри, проект уьмуьрдиз кечирмишуни чIурухъан 2500 гектардилай виниз чилер дигидайбурук кутадай мумкинвални гуда. Ида цIийи майданра багъларни уьзуьмлухар кутуниз, гьасилзавай продукциядин кьадар артухаруниз, 7500 касдиз кIвалахдин алава чкаяр арадал гъуниз куьмекда.
Водоводдин эцигунрин кIвалахрив 2008-йисуз эгечIнай. Икьван чIавалди Чирагъ вацIал яд кIватIдай чка туькIуьрна, ам ишлемишиз вахкана, яд михьдай тадаракрин имарат, ЛЭП эцигна, технологиядин тадаракар ремонт хъувуна, кардик кутуна.
Алай вахтунда объектдал Вини СтIалрин хуьруьз кьван яд тухудай рехъ гьазурнава. Ростовдай 500 миллиметрдин диаметрдин турбаяр хканва. И йикъара абур сад-садахъ акалунин кIвалахар кьиле тухузва.
Турбаяр сад-садахъ акалунин ва чиликай тухунин кIвалахар “Стройоригинал” ООО-ди кьиле тухузва. Икьван чIавалди 1050 метрдилай виниз мензилда турбаяр чилик кутунва, и кIвалах хъсан еришар аваз давамарзава. Алай йисан эхирдалди Вини СтIалдал кьван турбаяр чиликай тухвана акьалтIарда.
Журналистрихъ галаз хьайи суьгьбетда райондин кьил Нариман Абдулмуталибов “Сардаркент-Даркуш-Казмаляр” водопроводдихъ агьалияр гьам хъвадай, гьам дигидай целди таъминарунин жигьетдай авай метлеблувилел гегьеншдиз акъвазна.
— Водопроводдин эцигунар акьалтIаруни агьалийрин яшайишдин шартIар, райондин санитарноэпидемиологический гьалар хъсан хьуниз, Чирагъ вацIун ятар менфятлудаказ ишлемишуниз, экономика ва хуьруьн майишатдин хел вилик тухуниз екедаказ куьмекда, — къейдна ада. — И мурадар кьилиз акъатун патал район ва хуьрер федеральный ва республикадин программайрик кутуни агьваллувал, гьакIни агьалийрин яшайишдин дережа хъсанаруниз куьмекда.
Райондин администрацияди гьеле 2015-йисуз вичин къимет 15 миллион манат тир Кьасумхуьрел яд гъунин, канализациядин сетрин ва михьи ийидай тадаракрин проектдинни сметадин документар гьазурна. Объектдин эцигунрин кIва-лахар федеральный тайин метлебдин программадай кьиле тухузва.
Лугьун лазим я хьи, водопроводдин яд кIватIдай узелдай дигидай яд 2-нубатдин Кировский къаналдизни ахъайда.
Яргъивал 7565, 46 метр тир къанал Сардархуьруьн кефердинни рагъакIидай патахъай башламиш ва Курхуьруьн къерехда кефердинни рагъэкъечIдай пата куьтягь жезва.
КIварчагъ дередиз дигидай яд гъун ана вилик девирра яшамиш хьайи агьалийрин рикIин хиял тир. Гила, са шакни алачиз, лугьуз жеда хьи, мукьвал вахтара НуьцIуьгърин, Экенрин, Зизикрин ва КIварчагърин агьалийрал авахьна физвай дигидай яд агакьда.
Хазран Кьасумов
