Алатай ислен юкъуз Мегьарамдхуьруьн райондин админист­рацияда  2018-йисуз  районда налогрин жигьетдай авай мумкинвилер тайинарун патал тешкилнавай  идарайрин уртах комиссиядин заседание кьиле фена. 

Мярекатдал муниципальный райондин  кьилин везифаяр вахтуналди тамамарзавай Ариф Гьажиева  регьбервална.  Ана администрациядин экономикадин отделдин начальник Тимур Тегьмезова, гьакIни чилерин алакъайрин ва чил ишлемишунин,  финансар идара авунин месэлайрал машгъул  къуллугъчийри, налогрин органрин векилри, бязи хуьрерин кьилери иштиракна.

Ариф Гьажиева сифтени-сифте  райондин кьил Фарид Агьме­дова са гьафте идалай вилик  хуьрерин  администрацийрин кьиле­рихъ галаз хьайи гуьруьшдал раиж авур месэлаяр рикIел хкана.

Гуьгъуьнлай ихтилат хуьрерихъ налогрин жигьетдай авай мумкинвилерикай фена. И месэладай Тимур Тегьмезова доклад­ авуна. Кьилди къачуртIа,  ам чилин  ва эменнидилай къачузвай на­логрин жигьетдай  районда арадал атанвай гьаларикай рахана­.

Заседанидал хуьрерин чкайра чилин участокрин ва юзан тийизвай эменнидин  гьакъиндай  авай делилар  ахтармишунин ва цIийи делилар кIватIунин кIвалахдик йигинвал кутунин лазимвал авайдакай лагьана.

Хуьрерин администрацийра  майишатриз талукь  гьахъ-гьисабдин делилар “Налог-3” АИС-диз рекье тунин ва чилерин участокрин делилар майдандиз акъудунин месэлаяр мукьуфдивди веревирдна.

Заседание  башламишдалди вилик, къейдна кIанда, муници­па­­­литетдин налогар гузвай ксарин ва налогар илитIнавай объ­ект­рин гьакъиндай кIватIнавай делилар Росреестрдин РД-да авай Управ­ленидин делилрихъ галаз гекъигунин кIвалах кьиле тухванвай.

Засединида иштиракзавай хуьрерин администрацийрин кьилериз чпин мулкара “кьве тахан” нумраяр ганвай чилерин участо­кар винел акъудун патал кьиле тухузвай гьар йикъан кIвалах­дик­ гьерекат кутун ва, абурун гьакъиндай делилар дуьз­даказ туь­кIуьр хъувуна, ГКН-дин базада дуьздаказ къалурун тап­шурмиш­на­ва. “Кьве тахан” нумраяр арадал атун адахъ галаз алакъалу я хьи, бязи вахтара  кадастрдин гьисабдиз къачунвай нумра са участокдиз ганваз, гуьгъуьнлай гьа и нумра маса участокдизни ганваз хьунин дуьшуьшар арадал къвезва, гьаниз килигна  кадастрдин делилар “кьве таханбур” жезва.

Мегьарамдхуьруьн районда налогар кIватIунин ва цIийи объ­ек­тар гьисабдиз къачунин гьакъиндай авай гьалар, винидихъ къейд авурвал, са гьафте идалай вилик хьайи заседанидал веревирднай.

Ариф Гьажиева кIвалахда хьанвай агалкьунриз талукь яз  авур докладдай малум хьайивал, 2018-йисан алатнавай 10 вацран вахтунда райондин  умуми бюджетдиз, и вахтунда атун гуьз­лемишнавай кьадардив гекъигайла,  налогрин ва налогар тушир пулар 119,1 %  кьадарда аваз атанва. Алатай йисан гьа и вахтунив гекъигайла, агакьнавай пуларин кьадар 18813,8 агъзур манатдин (16,2%) артух хьанва.

Налогрин вири жуьрейриз талукь делилар раижнава. ИкI, кьилдин ксарин къазанжийрилай налогар къачунин план,  алатна­вай 10 вацран вахтунда 106,1%, алатай йисан кьадардив гекъи­гайла — 13%  артухни алаз  тамамарнава.

Докладчиди къейд авурвал,  райондин бюджетдиз къвезвай налогрин кьадар артухарун патал  администрациядин къарардалди махсус десте тешкилна, ада лагьайтIа, “Налогар гунин сад тир юкъуз” 537175 манатдин кьадарда аваз налогрин пул агакьун таъминарна. Налогрин ва налогар тушир пулар кIватIунин кIвалахда хъсан патахъ дегишвилер хьанвайдакай рахадайла къейд авурвал, и кIвалах эхиримжи 5-6 йисан вахтунда садлагьана виликди фенва.

Эгер 2012-2013-йисара районда 30 миллион манатдилай виниз  налогрин пулар кIватIзавайтIа, 2018-йисан 10 вацран вахтунда и делил тахминан 150 миллион манатдиз барабар хьанва.

Муниципалитетдин администрациядин информациядин отделдин руководитель Г.Закуевади  хабар гузвайвал, райондин кьили хьанвай агалкьунрал рази хьана  акъваз тавуниз эвер гана  ва администрациядин отдлелриз  талукь тир къурулушрихъ галаз­ сих алакъада аваз и кIвалах давамарун  тапшурмишнава.

Жасмина Саидова