Дагъустан Республикадин Кьил Сергей Меликов 12-августдиз къадим Дербент шегьерда мугьманвиле хьана. Ада яшайишдин метлеб авай са шумуд имаратдал кьил чIугуна, шегьер аваданламишзавай гьал ахтармишна ва чкадин агьалийрихъ галаз суьгьбетарна.

Сифте нубатда Сергей Меликов «Ватанперес» парк туькIуьрзавай чкадал фена. Ам кIвалахар кьиле физвай гьалдихъ галаз таниш хьана ва и проект тади гьалда уьмуьрдиз кечирмишунин гьа­къин­дай тапшуругъар гана. «Ватанпе­рес» парк Дербент шегьер комплексни­даказ вилик тухунин программадин сер­гьятра аваз арадал гъизва. Объект­дин умуми майдан 205 агъзур кв. метрдиз барабар я. Умуми къимет 408 миллион­ манатдилай алатнава. Имаратдал эцигунрихъ галаз алакъалу сифтегьан кIва­лахар куьтягьнава. Абурук амфитеатр, килигдай майдан ва гурар-трибунаяр, автомашинар акъваздай чка, футболдин майдан, теннисдал къугъвадай чка, электроэнергиядихъ, канализациядихъ, цихъ галаз алакъалу инженерный сетар, аялар къугъвадай майданар акатзава.

Алай вахтунда модулдин блокар сувагъламишзава, чиле плиткаяр, рекьера къир цазва, килигдай майдандин цлар шуьшеламишзава ва вири мулк аваданламишзава.

Дагъустандин Кьили авунвай кIва­лах­риз къимет гана ва жавабдарвал хиве авай къурулушриз имарат вахтунда­ ишлемишиз вахкунин тапшуругъ гана. ГьикI лагьайтIа, «Ватанперес» паркунихъ­ Дербентдин яшайишдин хел ва туризм вилик тухунин карда еке метлеб ава.

Сергей Меликов Дербентдин спортдин дворец эцигзавай чкадални фена. Ам Кеферпатан Кавказдин Федеральный округ вилик тухунин программадин гьисабдай эцигзава. 25 агъзур кв. метрдин майдан кьунвай дворецда 2,5 агъзур тамашачи патал чкаяр жедайвал я. Ам алай йисан эхирра ишлемишиз вахкуда. Ина хейлин кIвалахар куьтягьнава. Эцигунардайбуру ва маса пешекарри чпин хиве тунвай везифаяр лазим тирвал тамамарзава. Къецел ва къенепатар, дворецдин гьаятар къайдадиз гъизва.

Региондин Кьил комплекс эцигзавай гьалдихъ галаз ара-ара таниш жезвай. Гилани ада кIвалахар вилик физвайди къейдна. Подрядчикдал имарат къалурнавай вахтара куьтягьун тапшурмишна. С. Меликова къейдна хьи, спортдин дворец неинки Дербент шегьерда, гьакI Кьиб­лепатан Дагъустанда физкультура ва спорт вилик тухудай центрадиз элкъуьн лазим я.

Къадим шегьерда 1224 аялди кIел­дай умуми образованидин школадин дараматни эцигзава. Дагъустандин регьберди гьанални кьил чIугуна. Образованидин дарамат РФ-дин «Образование вилик тухун» госпрограммадин сергьят­ра аваз эцигзава. Ам регионда ва шегьердани алай аямдин лап хъсан школайрикай сад хьун гуьзлемишзава. Ана аялрин къуллугъда эхъведай кьве вир, 800 кас гьакьдай актовый зал, алава образование къачудай классар жеда. Дараматдин умуми майдан 7 агъзур кв. метр, проект­дин къимет 1,94 миллиард­ манат я. Сергей Меликова тамамарзавай кIвалах­рин еришар ва ери къейдна­. 2026-йисан 1-сентябрдиз школадин ра­кIа­рар аялриз ачух жедайвал, ада кIва­лахрик мадни йигинвал кутун тапшурмишна.

Дербентда 250 кас гьакьдай аялрин бахчани ачухиз гьазур хьанва. Ам  «Демография» милли проектдин сергьятра аваз эцигзава. Бахчада экуьнилай няналди сагълам, гьакI сагъламсуз аялрини вахт акъудда. Дарамат саки 97 процентдин куьтягьнава. УстIарар эхиримжи крарал машгъул я. Аялрин бахчадин къваларив гвай майданарни аваданламишнава. Бахча зулуз ачухдайвал я.

Сергей Меликов СВО-дин викIегь иштиракчи Руслан Примован тIвар ганвай республикадин инновациядин медколледждизни фена. Студентри респуб­ликадин регьбердиз экскурсия тешкилна. Абуру дяведин махсус серенжемда викIегьвал къалурай дагъустанвидикай суьгьбетна, адан уьмуьрдиз, женгиниз талукь экспонатар къалурна.

РикIел хкин, «Жуьрэтлувиляй» кьве орден авай Руслан Примов 2023-йисуз, вичин юлдаш къутармишдайла, телеф хьана.

Йикъан кьвед лагьай паюна региондин регь­берди Дербентда шегьер вилик тухунин месэлайриз талукьарнавай совещанини тухвана.

Гегьеншдиз РД-дин Кьилин сайтдай кIелиз жеда.

Хийир  Эмиров