Са тIимил йикъар идалай вилик Каспийскда, Али Алиеван тIварунихъ галай спортдин комплексда, Россиядин машгьур тешкилатди Бразилиядин джиу-джитсудай Кавказдин чемпионат кьиле тухвана.
Чпин ери-бине КцIар райондин Вини Тагьиржал хуьряй тир, Дербент шегьерда дидедиз хьана, ана яшамиш жезвай стхаяр-спортсменар Агьмад ва Муслим Ибрагьимоври нубатдин сеферда агалкьунар къазанмишна. Кьилди къачуртIа, 9 йис тамам хьанвай Агьмада (30 кг-дин заланвал авайбурун арада) хъипи чIуларин сагьибрин арада кимоно алаз ва кимоно алачиз кьве жуьредайни 1-чкаяр кьуна. 7 йис тамам хьанвай Муслима (24 кг-дин заланвал авайбурун арада) хъипи чIуларин сагьибрин арада кимоно алаз — 1 ва кимоно алачиз 2-чкаяр кьуна.
РикIел хкин: стхайри Дербентда тренер, дуьньядин, Евразиядин ва Россиядин чемпион тир чи ватанэгьли Мурад Къурбаналиеван гъилик «Акула» спортзалда чпин устадвал хкажзава.
