Дагъустандин властриз 2023-йисуз республикадин махсус программадин сергьятра аваз 300 миллион манат чара ийидай фикир ава. Им лагьайтIа, и йисуз харжнавайдан пудан са паюнин артух кьадар я. Идакай 2023-йис ва 2024-2025-йисарин пландик кутунвай вахт патал региондин бюджетдин закондин проектдиз талукь яз кьиле фейи ачух яб акалунрин вахтунда РД-дин финансрин министр Юнус Саадуева хабар гана.
“Муниципальный тешкилатра мектебриз фидалди образование гудай идараяр ремонт авуниз 2022-йисан бюджетда ситфедай 100 миллион манат фикирда кьунвай, алай вахтунда абурун кьадар 200 миллион манатдив агакьарнава. 2023-йис патал и рекьиз харжийрин кьадар 300 миллион манатдив агакьардайвал я”, — къейдна министрди.
Капитальный ремонтдиз талукь региондин проект Дагъустанда 2022-йисуз кардик кутунай. Ам мектебар капитальный ремонт авунин рекьяй федеральный программа къуватда гьатунихъ галаз алакъалу яз акъвазарай “100 мектеб” проектдиз ухшар я.
Проект уьмуьрдиз кечирмишун патал чара авунвай такьатар региондин мектебриз фидалди образование гудай идараяр бинедилай ремонт авунин рекьиз ракъурнава. Проектди республикадин бюджетдай чара ийизвай такьатрин 5 процентдилай тIимил тушиз финансар и рекьиз гьакIни муниципалитетрин бюджетрайни чара авун фикирда кьунва.
Дагъустандин экономикадин ва мулкар виликди тухунин министерстводи идалай вилик хабар гайивал, республикада, санлай къачурла, тахминан аялрин 900 бахча ава. Бинедилай ремонт авунин игьтияж абурукай 300 идарада арадал атанва.
Чи мухбир
