19-23-сентябрдиз Сочи шегьерда 27 сеферда алай аямдин журналистикадин «Вся Россия — 2023» лишандик кваз чIехи форум кьиле фена. Ада уьлкведин жуьреба-жуьре регионрай тир 1000-далай виниз журналистар санал кIватIна. 5 юкъуз давам хьайи и чIехи мярекат СМИ-рин векилар патал чирвилер къачудай, тежриба хкаждай мумкинвилер гайи чешмедиз элкъвена.
Форумда кьиле Урусатдин журналистрин Союздин Дагъустанда авай отделенидин председатель, «Лезги газетдин» кьилин редактор Мегьамед Ибрагьимов авай журналистрин чIехи дестедини иштиракна. Абурун арада «Этномедиахолдинг «Дагестан» ГБУ-дин руководитель Арсен Юсупов, «Дагестанская правда» газетдин кьилин редактор Бурлият Токболатова, «Дагъустан» РИА-дин регьбер Мегьамед Мегьамедов, «Дагъустан» РГВК-дин генеральный директор Камила Гьамзатова, Урусатдин журналистрин Союздин Дагъустанда авай отделенидин ревизиядин комиссиядин председатель Мурад Мегьамедкеримов, РД-дин информациядин ва печатдин векилар ва масабур авай.
Форумдин сад лагьай юкъуз РФ-дин журналистрин Союздин председатель Владимир Соловьев регионрин майданрал мугьман хьана. Алай йисуз чи республикади гьазурнавай майдан (стенд) Дагъустандин халкьдин шаир Расул Гьамзатован 100 йисан юбилейдихъ галаз алакъалу авунвай. Майдандал къелемдин устадрин ктабрин, Дагъларин уьлкведа чапдай акъатзавай газетринни журналрин выставкаяр тешкилнавай. Дагъустандин майдандал атай гьар са касдиз махсус техникадин куьмекдалди (очки виртуальной реальности) Расул Гьамзатован кабинетда сейр ийидай мумкинвал авай. В.Соловьева чи республикадин СМИ-рин векилрихъ галаз кьиле фейи гуьруьшдал дагъустанви журналистрин агалкьунар къейд авуна, делегация форумдиз гьазур хьанвай къайдадилай вичин разивал къалурна. Гуьруьшдин сергьятра аваз Мегьамед Ибрагьимова, Арсен Юсупова ва авар чIалал акъатзавай «Гьакъикъат» газетдин кьилин редактор Темирхан Гьасанова В.Соловьевав савкьатар вахкана. Камила Гьамзатовади «Дагъустан» РГВК-ди Р.Гьамзатован 100 йисан юбилейдиз талукьарнавай фильм арадал гъанвайдакай хабар гана ва ам маса регионрин, федеральный телеканалрай къалурунин карда В.Соловьевавай куьмек тIалабна. Союздин председателди вич и карда куьмек гуз гьазур тирди къейдна ва телеканалдин директордиз Дагъустанда авай отделенидихъ галаз герек чарар гьазурун теклифна.
20-сентябрдиз Дагъустандин делегацияди «Этномедиахолдинг «Дагестан». История развития национальной прессы» лишандик кваз медиапроектрин презентация кьиле тухвана. Адан сергьятра аваз асул доклад Мегьамед Ибрагьимова авуна. Вичин рахунра ада Дагъларин уьлкведин милли прессадикай суьгьбетна ва элкъвей столдин иштиракчияр милли журналистика, хайи чIал хуьнин ва вилик тухунин макьсаддалди «Лезги газетдин» редакцияди кьилиз акъудзавай 10 проектдихъ галаз танишарна. Арсен Юсупова алай йисуз регионда хайи чIаларал акъатзавай вири изданияр этномедиахолдингдик кутунвайдакай хабар гана ва и кардихъ милли газетар вилик финин карда гьихьтин метлеб аватIа къейдна. Элкъвей столдин сергьятра аваз винидихъ тIвар кьунвай холдингдикай, «Гьакъикъат» газетдин редакцияди Р.Гьамзатован уьмуьрдин ва яратмишунрин рекьикай гьазурнавай фильмайрин анонсар къалурна.
Къейд ийин хьи, чи республикадин медиапроектрин презентация «Вся Россия — 2023» форумда уьлкведин регионри кьиле тухвай виридалайни хъсан 10-дакай сад яз гьисабна ва ам РФ-дин журналистрин Союздин патай дипломдиз лайихлу хьана. Форумдал алай йисуз уьлкведин журналистрин арада жуьреба-жуьре темайрай кьиле тухвай конкурсдин гъалибчийривни шабагьар вахкана. Шад жедай кар ам я хьи, кIвенкIвечи чкаяр кьурбурун арада чи республикадин СМИ-рин векиларни авай. ИкI, «Дагъустан» ГТРК-дин корресподент, «Каспий-медиа» тешкилатдин репортер Хатима Нисредовади «2023-йисан журналистикадин виридалайни хъсан яратмишун» конкурсда («Тайна амузгинского булата» фильмдай), «Дагъустан» РГВК-дин корреспондент Умай Ибрагьимовади «Вся Россия — 2023» форумдин махсус конкурсда («Что мы защищаем» фильмдай) 3-чкаяр кьуна.
«Вся Россия — 2023» форум гьар йисуз кьиле физвай чIехи мярекат я. Лагьана кIанда, адан сергьятар — йисалай-суз гегьенш, иштиракчийрин кьадар артух жезва. Форумдин сергьятра аваз хейлин семинарар, элкъвей столар, презентацияр, гуьруьшар ва маса серенжемар тешкилзава, журналистри анра активнидаказ иштиракзава, чпин чирвилер артухарзава, фикирар лугьузва. Форумдин кар алай терефрикай сад жуьреба-жуьре регионрай тир журналистар сад авун, абурун арада дуствилин алакъаяр мягькемарун я.
Лагьана кIанда, форумдин сергьятра аваз РФ-дин журналистрин Союздин Дагъустанда авай отделениди Москвадин, Краснодардин крайдин, Мордовия Республикадин отделенийрихъ галаз санал са шумуд проект кьилиз акъуддай икьрарарни кутIунна.
Мегьамед Ибрагьимов,
кьилин редактор
