КIвал маса къачун ­патал

Регионра кIвалерин къиметар ва агьалийри къачузвай мажибрин юкьван дережадин кьадарар фикирда кьурла, дагъустанвийри кьилдин кIвал (частный дом) маса къачун патал 20 йисан къене пул кIватIун герек жезва. Ихьтин веревирдерал «Квартирайрин алем» порталдин аналитикар атанва, кхьизва «Дагъустандин экономика» телеграм-каналди.

Ахтармишунри къалурзавайвал, Дагъустандинни (20 йис) Чечнядин (19 йис) агьалийри и макьсад патал виридалайни яргъал йисара пул кIватIун герек жезва. Уьлкведа ихьтин 10 региондик агъадихъ галай чкаярни акатзава: Севастополь, Ингушетия, Краснодардин край, Крым, Санкт-Петербург, Калининграддин область, Ка­рачаево-Черкесия ва Адыгея. И регионра 13-17 йисуз пул кIватIун лазим жезва.

Къиметар вучиз хкаж хьанва?

Дагъустанда йисан инфляция августдиз 5,04 процентдин хкаж хьанва, адалай вилик квай вацра и рекъем 3,61 процентдикай ибарат тир.

«Дагъустандин экономика» телеграм-ка­нал­ди хабар гузвайвал, манат зайиф хьуникди­ къецепатан уьлквейрай гъизвай метягьрин къиметар багьа хьанва. Нетижада йисан къене апель­синрин, бананрин, афнийрин, лимонрин къиметар виниз акъатнава, ичерин къимет аватунин еришни яваш хьанва.

Манат зайиф хьунин себебдалди къушар хуьниз акъатзавай харжиярни артух хьанва. Кьилди къачуртIа, и хиле ишлемишзавай тадаракар ва емдик кутадай алава затIар маса къачун багьаз акъваззава. Вечрен якIунин къимет хкаж хьунни и делилдихъ галаз алакъалу я.

Тек са регион я

Дагъустан цIийиз эцигнавай кIвалерин квартирайрин къиметар агъуз ават тийизвай тек са регион я. Идакай «Дагъустандин экономика» те­леграм-каналди хабар гузва.

ИкI, эцигунардайбурун Сад тир ресурс­дин аналитикри къейдзавайвал, Кабардино-Бал­ка­рия ресрубликада квартирайрин къимет вацран­ муддата виле акьадайвал агъуз аватнава – са «квадратдай» 62 154  манат (- 3,0 процент). Да­гъустанда лагьайтIа, къиметар дегиш хьанвач –  са «квадрат» 64 агъзурдай яз ама.

ЦIийи отделение

Махачкъалада онкологиядин центрадин бинедаллаз экв гуналди сагъардай (лучевая терапия) цIийи отделение ачухнава. Идакай респуб­ликадин здравоохраненидин министерстводин телеграм-каналди хабар гузва.

ЦIийи дарамат алай девирдин истемишунрив кьадай жуьреда хкажнава. Ана вини дережадин кьве радиотерапевтический тадарак эцигнава. Абурун куьмекдалди гила ихьтин мумкинвилер жеда:

— зиянлу еридин буьвелар (злокачественные опухли) тайинарун патал алай девирдин къайдаяр кардик кутун;

— хирургиядин опрецийрин кьадар тIимиларун;

— кьилин мефтIедин метастазриз гъвечIи чанахъдин (малый таз) буьвелриз экв гуналди терапия авун, икьван гагьди республикада и кар тамамдиз ийиз жезвайди тушир;

— терпапиядин хатасузвал артухарун: цIийи аппаратра зиянлу затI (ионизирующее вещество) авач.

Онкологиядин центрадин кьилин духтур Владимир Брежнева къейд авурвал, виликан аппаратрал терапиядин са бязи жуьреяр кьиле тухудай мумкинвал авачир. Гьаниз килигна, агьалияр республикадилай къецепатаз ракъуруниз мажбур жезвай. Алай вахтунда ихьтин чарасузвал амач.

Гьазурайди — Муса Агьмедов