Рафтарвилерин месэла

Брюсселда 27 уьлкведин къецепатан крарин министррин заседание кьиле фейи вахтунда Германиядин МИД-дин кьил Х.Маа­са малумарайвал, Европадин союздин (ЕС) уьлквеяр Россиядихъ галаз суьгьбетар кьиле тухуз гьазур я. Идакай 10-майдиз “ТАСС” чешмеди хабар гана.

Х.Маасан гафаралди, ЕС-ди Москвадин патайни суьгьбетар кьиле тухунин жигьетдай гьазурвал гуьзетзава. Идалай вилик Словакиядин МИД-дин кьил И.Корчока Евросоюздиз Россиядихъ галаз авай татугай рафтарвилерин гьалар акъвазаруниз эвер ганай. Адан гафаралди, ЕС-дин ва РФ-дин арада гележегда алакъа­яр пис хьун садазни герекзавач.

Пайгардик ква

Россияда 21,5 миллион касдиз коронавирусдиз акси рапар янава. “Новости» РИА-ди хабар гузвайвал, идакай уьлкведин Президент Владимир Путина малумарна. “Уьлкведа нетижаяр лап хъсанбур я”, — лагьана ада.

В.Путина къейд авурвал, COVID-19 азардиз акси вакцинация­дин месэла уьлкведа пайгардик кваз кьиле физва. Гьа са вахтун­да ада вакцинадин рапар ягъунин еришар ва коронавирус кватIа чирунин тестер кьиле тухунин кIвалахар вилив хуьн герек тирди регионрин регьберрин рикIел хкана.

Алай вахтунда Россияда кьуд вакцина тестикьарнава. Асул гьисабдай уьлкведа сифте яз регистрация авур “Спутник V” вакци­надин рапар язава. Гуьгъуьнлай “ЭпиВакКорона”, “КовиВак” вакцинаярни тестикьарна. Эхиримжиди яз “Спутник Лайт” тIвар алай са компонентдикай ибарат вакцина регистрация авуна, адан таъсирлувал 79,4 процентдикай ибарат я.

Вахтуналди кардик кухтада

Футболдай Европадин чемпионат кьиле фидай вахтунда Фин­ляндиядин гьукумдарри Россиядихъ галаз авай ракьун рекьин алакъа гуьнгуьна хтунин къарар кьабулнава. Идакай “Новости” РИА-ди хабар гузва.

Къейдзавайвал, Хельсинкидай Санкт-Петербургдиз физвай поездар алай йисан июндиз футболдай Европадин чемпионат кьиле фидай йикъара кардик ахкатда.

Ракьун рекьин гьерекатар кардик акат хъийидатIани, санай масаниз фидай ихтиярар анжах кьилдин ватандашриз жеда. Ма­лум тирвал, коронавирусдин тIугъвал себеб яз кьве уьлкведин арада туристар къекъуьнин гьерекатрал гьам Россияди, гьам Финляндияди сергьят эцигнава.

Индияда хъсанзавач

Индиядин оппозициядин сиясатчи Рахул Гандидин фикирдал­ди­, эгер коронавирусдин тIугъвал гуьзчивилик кутун тавуртIа, уьл­кве ичIи хъхьун мумкин я. Адан гафар “Reuters” чешмеди ра­ижнава.

Сиясатчиди милли локдаун кардик кутунин, вирусдиз акси ра­п­ар ягъунин кар йигинарунин патахъай Индиядин гьукуматдин кьил Н.Модидиз тавакъудин чар кхьенва. Ада къейднавайвал, эгер вирусдин лепе акъвазарун патал кьетIи серенжемар кьабул тавуртIа, арадал къведай гьалари дуьнья къурхулувилик кутун мумкин я.

Чешмеди алава хъийизвайвал, Индияда 7-майдиз COVID-19 азар акатнавайбурун цIийи антирекорд тестикь хьана — суткадин­ муддатда 414 агъзурдалай гзаф инсанрик коронавирус акатна.

Журналистар патал хаталу я

Украинада “Russia Today” видеоагентстводин журналист гатана, хабар гузва “Новости” РИА-ди.

Къейдзавайвал, Гъалибвилин суварикай куьчейра къекъвезвайбурувай хабарар кьуна лугьуз, журналист гатана. Арадал атанвай агьвалатдин патахъай тамам делилар гьеле раижнавач. Гъалибилин йикъахъ галаз украинвийрин рафтарвилер гьихьтинбур ятIа чирзавай журналист гатайдалай кьулухъ  Россиядин журна­листрин Союздин секретарь Т.Шафира Украина журналистар патал­ хаталу уьлкве я лагьана. Ада къейд авурвал, СМИ-дин ве­килрал гьужумар авунин жигьетдай Европадин уьлквейрин арада­ Украина­ кIвенкIве авайбурукай я. Адан гафаралди, алатай йисуз ачухдаказ гьужум авур 80 дуьшуьш дуьздал акъудна. Нетижада­ 100-лайни­ гзаф журналистриз хасаратвилер хьана. И дуьшуьшар, секретардин гафаралди, анжах официальнидаказ малумарнавайбур я.

Уьмуьр яргъи ийидай къайда

США-дин милли институтдин алимрин дестеди тестикьарнавайвал, гьар юкъуз лазим кьадарда камар къачуни инсандин сагъламвал хъсанарзава, хабар гузва «Express» чешмеди.

Къейдзавайвал, пешекарри 40 йисалай виниз яшар тамам хьанвайбур ахтармишунин гьерекатдиз пуд йисан муддатда фи­кир гана. Ахтармишунин серенжемда иштиракай сад лагьай дес­теди гьар юкъуз 4 агъзур кам къачуна, кьвед лагьай дестеди — 8 агъ­зур кам. Пуд лагьай дестеди суткадин къене 12 агъзур кам къа­чуна. Нетижада тайинарайвал, 2 ва 3-дестейрин иштиракчийрин уьмуьр яргъи жезва.

И мукьвара алимри ички ишлемиш тавуникди инсандин уьмуьр 28 йисан артух жезва лагьанай. Швециядин алимри 20 йисан муддатда чпин умуьр ичкидилай аслу хьанвай агьалийрин сагъламвал вилив хвена.

«Лезги газет»