11-майдиз Казань шегьердин (Татарстан Республика) са мектебда мусибат арадал атана: 19 йиса авай чкадин агьали Ильназ Галявиева муаллимриз, аялриз гуьлле гана. Эхиримжи делилралди (12-майдин), нетижада 9 кас телеф, са шумуд цIуд касдал хирер хьана. Кьейибурун чIехи пай 8-классда кIелзавай аялар я.

Къанлу кьунва, уголовный дело къарагъарнава. Силисдин органри арадал атай мусибатдин дуьшуьшдай тамамдиз кьил акъудунин серенжемар кьиле тухузва.

Дагъустандин Кьилин везифаяр вахтуналди тамамарзавай Сергей Меликова телеф хьайибурун хизанриз ва Татарстандин кьил Рустам Миннихановаз башсагълугъвал гана.

“Казанда арадал атай мусибатди чун вири къарсурна. Чна Татарстандин халкьдихъ галаз абурун дерт пайзава”, — лагьана Сергей Меликова.

«Лезги газет»