Дагъустандин вице-премьер Абдулмуслим Абдулмуслимова мусурманрин Къурбанд суварин вилик махсус совещание кьиле тухвана. Як маса къачудайбурун кьадар артух хьуниз килигна, суварин йикъара адан къимет хкажуниз рехъ тагунин месэладиз совещанидал кьетIен фикир гана.
Гьар са мусурмандивай, са четинвални авачиз, як маса къачуз хьун патал А.Абдулмуслимова фермерриз ва къурбанд авунин крар тешкилзавайбуруз якIун къиметар хкаж тавуниз эвер гана.
Идалайни гъейри, ада СанПиН-дин, ветеринариядин рекьяйни талукь тирвал гуьзчивал тухун, гьайванар азарлу туширвилин гьакъиндай шагьидвалзавай документар хьун, коронавирусдин тIугъвалдин шартIара малумарнавай серенжемрални амал авун лазим тирди лагьана.
ТукIур гьайванрин къенер-кьилер зирзибилрин хъуртарал гадардач, абур махсус ихтиярар авай идаради лазим къайдада тергда.
«Лезги газет»
