ЦIийи йисар къвез физва. Гьарда умуми тарихда, государствойрин сиясатда, инсанрин уьмуьрда вичин хъсан ва я пис гел тазва. Хъипи КицIин йисни гьам дуьньядин майданда, гьам Россиядин Федерацияда пара лишанлу, важиблу, кьетIен ва муракаб вакъиаяр кьиле финалди тарихда гьатда.
Гила къаршидал 2019-йис атанва. РагъэкъечIдай патан гороскопра къейднавайвал, Хъипи (къизилдин) Чилин ВакIан йис. Ам 2019-йисан 5-февралдиз вичин ихтиярда гьатзава ва ада 2020-йисан 24-январдалди махлукьатриз къуллугъда.
ЦIийи йис гьикI къаршиламишда? И суал гзафбуру гузва. Чун гьа суалдиз жаваб гуз алахъда.
Гороскопда къейдзавайвал, сифте нубатда, кIвале къайда, михьивал туна кIанда. Эгер бязибуру фикирзаватIа, вак чиркин гьайван я, туш. Адаз михьивал пара кIанда. Ада чиркин чкайра вучиз къатадзава лагьайтIа, гьа идалди ам вичик квай микробрикай азад жезва.
ЦIийи йис алукьдалди вилик кIвале авай кьацI, фер фенвай, синих квай къаб-къажахни гадарна кIанда. ТахьайтIа, ВакIан йисуз квез финансрин кIвалахда агалкьунар, хъсан къазанжияр жедачалда.
ВакIан йис кьилди, текдиз къаршиламишунни теклифзавач. ВакIаз ван алай межлисар, суфраяр, кIандайди я. Ам амайбурулай тафаватлуни жез алахъда. Адаз таб, гьилле, хаинвал ерли хуш туш. Пул харждай устIар я ам. ЦIийи йисуз алукIдай парталрин рангарикай рахайтIа. вакIаз хушбурук жегьре (къизилгуьлдин), шефтелдин, шуьтруь рангар акатзава.
Гьайвандиз гуьзел, стилдин шейэр кIанда. Кьилинди ам я хьи, алукIзавай партал хкатна аквадайди, масадбуруз ухшар авачирди хьун лазим я. Парталар къумадин, шуьтруь, кофедин, кIерецдин рангаринбур хьайитIа, мадни хъсан я.
Чилин ВакIахъ лайихлувилер пара ава. Ам чакай гьар садни ва чун элкъуьрна кьунвай тIебиатни хуьз гьазур я. Ада бул бегьерар арадал атун, хъсандиз ял ягъун, сиягьатар, турпоходар хьун хиве кьазва. Мукьвал-мукьвал тIебиатдал ял ягъиз фин, беден халкьдин дарманралди сагъламарун, мягькемарун меслятзава.
2019-йис мехъерар ийиз, цIийи хизанар кутаз лап кутугайди я. Чилин ВакIа субай инсанриз тай-пай жагъуриз, эвленмиш хьанвайбурун алакъаяр пайгардик кутаз куьмекда. Хъсан мурадарни кьилиз акъатда, анжах абур арадал атун патал рикIивай алахъна кIанда.
Чилин ВакIа алукьзавай йисуз къацу, шуьтруь, жегьре ва хъипи рангар хъсанбур яз гьисабзава. ВакIан йисуз агалкьунрикай магьрум тахьун патал сувар жуван багърийрихъ, дустарихъ, руьгьдай мукьвабурухъ, санал карчивал ийизвайбурухъ галаз тухун теклифзава.
Инсанри фикирзавайвал, ВакIан алакъа пул кIватуIнихъ (копилкадихъ) галазни ава. Гьавиляй 2019-йисуз девлетлу хьуник, хъсан къазанжияр атуник умуд кутун лазим я. Гзафни-гзаф чилел кIвалахзавайбуруз, хуьруьн майишатда, фермервилел машгъулбуруз хъсан хийирар жеда. Чилин ВакIа лугьузвайвал, карчийрихъни чIехи агалкьунар жеда. Кар алайди зегьметдал рикI хьун, куьлуь-шуьлуьйриз пулар харж тавун, гьар са месэладив рикIивай эгечIун я. ЦIийи йисан савкьатар гуз хьайитIа, сифте нубатда копилка пишкешун меслятзава. Адан рангни къизилдинди хьун лазим я.
Гороскопра девлетлу хьунихъ галаз алакъалу хейлин теклифар ава. Эгер пулдин патахъай игьтияжда гьат тавуна кIанзаватIа, ЦIийи йисан суфрадал булвилелди недай-хъвадай шейэр эцигун лазим я. Гьар са хуьрек, емиш, майва тазади, тIямлуди, иштягь ачухдайди ва ацIурдайди хьун герек я. Фикир гузвани, ам ЦIийи йисан суфрадал лапагдин, малдин, къуьрен ва маса гьайванрин якIун хуьрекарни эцигуникай бейкеф жедач. ГьакI уьрдегдин, уьндуьшкадин, къазран якIун хуьрекарни, хьайитIа, пис туш. Гьа са вахтунда майвайрин салатар, ниси, пахлаяр, харар, къацу хъач-мач суфрадал эцигиз рикIелай алудмир.
ВакIан йисуз девлетлу жедай фикир аватIа, буш чантаяр я кIвале, я жибинда туна виже къведач. Абур пуларай ацIурун теклифзава. Йис алукьзавай чIавуз пулдив ацIай кисеяр гъилера аваз хьурай.
Са нин ятIани бурж аламаз ВакIан йис къаршиламишун ерли хъсан лишан яз гьисабзавач. Тади гьалда алай вири буржар алудун лазим я. ТахьайтIа, буржарин кьадар мадни артух жеда. Гьа са вахтунда 1-январдиз масадбурувни бурж, гьатта са манатни, вугун меслятзавач. Эгер вугайтIа, вири йис пулдихъ галаз алакъалу татугай месэлаяр гьялиз акъатда.
Гьа икI, чахъ Хъипи Чилин ВакIан йис илифзава. Къуй ам чи вири ватанэгьлияр, газет кIелзавайбур патал ислягьди, сагъламди, берекатлуди, гьар са карда агалкьунринди ва къазанжияр арадал гъидайди хьурай!
Хийир Эмиров
