Коронавирусдин вилик пад кьун патал Дагъустанда арадал гъанвай штабди республикадин шегьеррани районра тIугъвал акатнавайбурун кьадарриз талукь делилар раижнава. Абур “Зи Дагъустан” сайтда чапнава.
29-апрелдиз талукь делилралди, коронавирусдин есирда гьатнавайбур виридалайни гзаф Махачкъалада ава (502 кас). Гьалар Каспийскдани (61 кас), Хасавюрт районда (52 кас), Къарабудахкент районда (40), Сергокъала районда (34 кас), Хасавюрт шегьерда (44 кас), Хунзах районда (32 кас) са акьван хъсанзавач.
Кьиблепатан Дагъустанда тIугъвал саки авач лагьайтIа жеда. Кьилди къачуртIа, Кьурагь, Мегьарамдхуьруьн, Агъул, Хив, Табасаран, Ахцегь, Докъузпара районра коронавирус акатнавай са касни авач. Сулейман-Стальский районда тIугъвал акатнавай — 2, Рутул районда — 1, Дербент районда — 1, Дербент шегьерда — 19, Дагъустандин Огни шегьерда 2 кас ава. Мадни коронавирус Ахвах, Къули, Ногъай, ЧIарода районривни агакьнавач.
«Лезги газет»
