Дагъустандин здравоохраненидин министерстводин кьил Жамалудин Гьажиибрагьимова тIугъвалдин шартIара дарманрин кьитвал хьуниз рехъ гайи азарханайрин кьилин духтуррин кIвалахдилай наразивал къалурна. Идакай “Лезги газетдиз” министерстводин пресс-къуллугъди хабар гана.
27-апрелдиз Махачкъалада азарханаяр коронавирус акатнавайбур сагъар хъийидай дарманралди таъминарунин месэлайриз талукьарнавай совещание кьиле фена. Малум хьайивал, Бабаюрт, Акуша, Унцукул ва Къаякент районрин кьилин азарханайра дарманар бес кьадар авач. И делилди тIвар кьунвай идарайрин кьиле акъвазнавай ксар чпин хиве авай везифайрив жавабдарвал авачиз эгечIзавайдакай лугьузва. Дарманар маса къачун патал пулдин такьатар виликамаз чара авунвайтIани, абурулай и месэла гьялиз алакьнач.
Совещанидин сергьятра аваз Жамалудин Гьажиибрагьимова азарлубуруз медицинадин рекьяй гузвай куьмекдин еридин жигьетдай жавабдарвал кьилин духтуррин хиве авайди къейдна.
— Чна гьалар къвердавай пис хьун мумкин тирди виликамаз лагьанай, — рикIел хкана РД-дин здравоохраненидин министрди. — И кар фикирда кьуна, азарханаяр бес кьадар дарманралди таъминарунин месэла хсуси гуьзчивилик кутун лазим тир. И макьсадриз пулдин такьатарни виликамаз чара авунвай. Эгер квевай квел ихтибарнавай везифаяр кьилиз акъудиз жезвачтIа, ачухдиз лагь, — къейдна Ж.Гьажиибрагьимова.
Вичин рахунра ада гьакIни поликлиникайрин кIвалахни къайдадик квачирдакай лагьана. И кардихъ галаз алакъалу яз, тади куьмекдин къуллугъдал алава пар ацалтзава. “ТIугъвалдин шартIара кьиле тухвай кIвалахдин нетижаяр кьадайла, гьар са кьилин духтурдин кIвалахдиз дуьзгуьн къимет гуда”, — лагьана министрди.
Агьмед Магьмудов
