28-апрелдиз Г. Къазиагьмедован тIварцIихъ галай Дербент шегьердин педколледжда Дагъустандин пешекарвилин идарадин 100 йис тамам хьуниз талукьарнавай мярекат шад гьалара кьиле фена. Ам Россиядин Федерациядинни Дагъустан Республикадин гимнаяр тамамарунилай гуьгъуьниз гьуьрметлу мугьманри Россиядинни Дагъустандин пайдахар хкажунилай башламиш хьана.
Мугьманри яргъал йисара Дербентдин педколледждин кьиле зегьмет чIугур рагьметлу Г. Къазиагьмедован тимталдал цуькверин кIунчIар эцигна. Иллаки Гьажиагьмед Беговича кIвалахай девирда колледж вири Дагъустандин школаяр патал педкадрияр гьазурзавай халисан чатуниз элкъвена. Адалай сад хьтин фикиррал алай сих коллектив арадал гъиз алакьна.
Идалай гуьгъуьниз вири актовый залдиз хкаж хьана. Мярекатда Дагъустан Республикадин Гьукуматдин Председателдин заместитель Муслим Телякавова, Дербент шегьердин кьил Рустамбег Пирмегьамедова, РД-дин образованидин ва илимдин министр Яхья Бучаева, Г.Къазиагьмедован хва Феликс Къазиагьмедова, шегьердин собранидин депутатри, школайрин ва колледжрин директорри, жемиятдин тешкилатрин векилри ва масабуру иштиракна.
Муслим Телякавова муаллимриз юбилей тебрикна, галатун тийижиз чIугвазвай зегьметдай сагърай лагьана, яратмишунра агалкьунар хьун алхишна, Гьукуматдин Председатель Абдулмуслим Абдулмуслимова коллективдиз ракъурнавай тебрикдин чар раижна.
Анал тебрикдин гафар гваз Яхья Бучаев, Рустамбег Пирмегьамедов, Феликс Къазиагьмедов ва масабурни рахана. Педколледждин директор Шарафутдин Сейидова коллективдин ва студентрин тIварцIихъ хуш келимаяр лагьай ва тебрикар авур мугьманриз сагърай лагьана. Мугьманриз колледждин студентри ва муаллимри манийрикай ва кьуьлерикай ибарат вижевай программа къалурна.
Юбилейдин мярекатра, адет хьанвайвал, колледждин лап хъсан муаллимриз ва зегьметдин ветеранриз гьукуматдин шабагьар гана. Эхирдай колледждин кабинетриз экскурсия авуна.
Къагьриман Ибрагьимов
