Дагъустанда ципицIрин чубукар гьасилдай къелемлух арадал гъидай фикир ава. Идакай РД-дин Кьилин пресс-къуллугъди Сергей Меликов Ахтармишунардай милли “Курчатован институт” центрадин президентдихъ галаз гуьруьшмиш хьайидалай кьулухъ хабар гана.
“Республикада чи филиал ачухун ва чкадин сортарин чубукар (къелемар) гьасилдай майдан чара авун теклифзава. Россиядин сортарин кIватIалар хуьнин ва генетикадин делилрин милли база ацIурунин жигьетдай уьлкведин Президентдин тапшуругъ ава. Чна алай аямдин тадаракар гъида ва вири и кIвалах еридин гьакъиндай цIийи дережадиз акъудда. Республикадихъ зурба мумкинвилер ава — гьа жергедай яз, виниз тир дережадин илимдин рекьяйни”, — малумарна М.Ковальчука гуьруьшдин вахтунда.
РД-дин уьзуьмчивилин ва ички квай шейэрин месэла гуьнгуьна тунин рекьяй комитетдин председатель Шериф Керимханован гафаралди, цадай къелемрихъ авай игьтияж республикада 4-5 миллион чубукдилай тIимил туш. Гьа са вахтунда республикада карантиндин хаталу зиянкар аваз хьуни, адан гафаралди, арадал гъизвай цIийи къелемар анжах зиянкарриз акси серенжемар кьабулнавайбур, абуруз акси дурум гуз жедайбур хьун истемишзава.
РикIел хкин, республикада гьакIни ципицIрин, емишрин, майвайрин ва хуьруьн майишатдин маса жуьредин культураяр микроклональный жуьреда артмишунин рекьяй лаборатория арадал гъунин кIвалах тухузва.
“2021-йисалай эгечIна, Дагъустандин алимрилай цун патал гьазур тир ихьтин къелемар арадал гъиз алакьнава, республикадин шартIариз хас тир чкадин ципицIрин ва емишрин культурайрин сортар ишлемишиз башламишнава. Планрик набататар чкадин шартIарив вердишарунин сифтегьан кIвалахрал тамамдаказ гуьзчивалдай теплица туькIуьрун ва къелемар арадал гъизвай адетдин теплицайрин майданар гегьеншарун ква. Ида гьасилзавай сагъламарнавай цадай материалдин, яни къелемрин, кьадар йиса 100 агъзурдав агакьдайвал ва мадни гзафардай мумкинвал гуда”, — лагьанва малуматда.
Къейдзавайвал, санлай къачурла, республикадин уьзуьмчивилин ва чехирчивилин хилера карчивилин 247 субъект, гьа жергедай яз хуьруьн майишатдин 99 тешкилат ва лежбервилинни фермервилин 148 майишат кардик ква.
Чи мухбир
