Алай йисуз Дагъустандай гьаждал 10 агъзур кас фида. Идакай мукьвара РД-дин милли сиясатдин ва динрин крарин рекьяй министерствода кьиле фейи пресс-конференциядал хабар гана.
Ведомстводин регьбер Энрика Муслимова къейд авурвал, республикадин саки вири шегьеранни районра гьаждал физвай дагъустанвийрихъ галаз гъавурда тунин гуьруьшар кьиле тухванва.
Алай йисуз чи республикадай гьаждал физ кIанзавайбур гзаф хьунихъ галаз алакъалу яз, Дагъустандиз алава 5 агъзур чка чара хъувуна. Санлай къачурла, Урусатдай Меккадиз фидай мусурманрин 40 процент дагъустанвийри тешкилда.
Гьаждин кампания 23-июлдилай гатIунзава. Гьаждин месэлайриз талукь яз РД-дин милли сиясатдин ва динрин крарин рекьяй министерствода югъди-йифди жаваб гудай телефондин нумра кардик кутунва.
Мярекатдин сергьятра аваз “Марва-Тур” ООО-дин генеральный директор Булат Къурбанова хабар гайивал, гьаждал физвай вири дагъустанвияр Меккадиз самолетра аваз рекье гьатда. Адан гафаралди, алай йисуз къецепатан уьлкведиз фин патал герек къвезвай визаяр электронный къайдадинбур авунва.
Пресс-конференциядал журналистрикай сада автобусра аваз фидай мумкинвал тахьунин себеб вуч ятIа хабар кьуна. Б.Къурбанова къейд авурвал, Дагъустандай Саудиядин Аравиядиз чилелай фидайла гьалтзавай бязи уьлквейра авай гьалар къизгъинбур тирди фикирда кьуна, хатасузвал патал анжах самолетра аваз фидай къарар кьабулна. И жигьетдай Дагъустанди “ЮТэйр” ва Арабрин Сад хьанвай Эмиратрин государстводин “Флай Дубай” авиакомпанийрихъ галаз икьрарар кутIуннава.
Тешкилатчийри Меккадиз физвай вири дагъустанвияр гьаждин вахтунда кьиле тухвана кIанзавай адетрин гъавурда твазвай махсус кIватIалралди таъминарнава. Абурун сагъламвални кьетIен гуьзчивилик жеда.
Агьмед Магьмудов
