Къенин ихтилат Украинадин Днепропетровск шегьердин машгьур клиникада кIвалахзавай лезги духтур Зара Зубаировна Мегьтихановадикай я. Ам 1988-йисан 10-июндиз Харьков шегьерда духтуррин хизанда дидедиз хьана.
Зара духтурдин буба Зубаир Мегьтиханов медицинадин илимрин доктор, Харьковдин дипломдилай кьулухъ гузвай образованидин медицинадин академиядин хирургиядинни топографический анатомиядин кафедрадин доцент, адан ери-бине Сулейман-Стальский райондин Кьасумхуьрелай я. Диде — Зарема Шамиловна — духтур, ультразвуковой диагностикадин пешекар я. Стха Зарбегани вичин пеше медицинадихъ галаз алакъалу авунва — ада алай йисуз Харьковда медицинадин университет куьтягьна ва хирургвилин пешедай интернатурадик экечIнава.
Кьисметди хайи ерийривай яргъаз акъуднаватIани, Зубаир Мегьтиханова вичин веледриз гъвечIи чIавалай лезги халкьдин милли меденият, адетар кIанарна. И хизанди гьар йисуз тIатIилрин вахтунда ватандал кьил чIугун адетдиз элкъуьрнава. Ватандин ажайиб чкаяр веледриз къалурунал, халкьдин тарихдикай суьгьбетар авунал Зубаир Селимовичан рикI гзаф ала. Гъурбатда кIвал-югъ кутунватIани, ватандихъ, багърийрихъ галаз да-тIана чими рафтарвилер хуьзва.
2005-йисуз къизилдин медалдалди мектеб куьтягьайдалай кьулухъ Зара Мегьтиханова Харьковдин медицинадин университетдин стоматологиядин факультетдик экечIна. Вичин вахтунда сарарин духтур, хирург яз кIвалахай Зарадин чIехи бубани медицинадин илимдал машгъул хьана.
ЧIехи бубадилай чешне къачуна, адан меслятрихъни насигьатрихъ дикъетдивди яб гана, Зарадини адан рехъ давамарун кьетIна. Гьеле мектебда кIелза-вай чIавалай илимдин кIвалахдиз итиж авуна, бубадин куьмекдалди вичин сифтегьан илимдин кIвалахни чапна. Гуьгъуьнлай адаз Украинадин илимрин гъвечIи академиядин векилвилин диплом гана. Илимдиз гьахьунилай гъейри, ада гзаф кьадар ктабарни кIелзавай.
Зара Мегьтихановади медицинадин университет 2010-йисуз яру дипломдалди куьтягьна. Сифтедай сарарин духтурдин куьмекчи яз кIвалахна.
“Духтурди вичин патав атай гьар садан чинал хъвер хкун лазим я”, — лугьузва пешекарди.
Тежриба кIватIай йисар бегьерлубур, агалкьунар галайбур хьана. Лезги духтурди вичихъ галаз кIвалахзавайбурун ва куьмек кIанз патав къвезвайбурун патайни гьуьрмет къазанмишна. Гьавиляй адан патав Германиядай, Англиядай, Туьркиядай сагъар хъувун патал инсанар къвезва.
Алай йисан мартдин вацралай ам Днепропетровск шегьердиз куьч хьана ва ина “AmeI DentaI CIinic” клиникада аялрин духтурвиле кIвалахзава. Къейдна кIанда хьи, тIвар кьунвай клиника дуьньядин лап хъсан кьве вишдакай сад я.
“Харьковда “Самур” тIвар алай лезгийрин диаспора ава, гьар йисуз лезгийри санал кIватI хьана Яран сувар шадвилелди кьиле тухузва. Украинада дидедиз хьанватIани, амма рикIе ата-бубайрин хайи чилин кIанивал ава”, — лугьузва ватанпересвилелди Заради.
Лайихлу пешекарар, халисан ватанпересар мадни гзаф хьурай чахъ.
Куругъли Ферзалиев
