ЧIехи кукIушрихъ рекье
Алай вацран эвелра Буйнакскда боксдай Дагъустандин кIвенкIвечивал патал 17-18 йисара авай жаванрин ва 19-22 йисар тамам хьанвай жегьилрин арада са шумуд юкъуз акъажунар кьиле фена. Чи ватанэгьлийрикай ана Александр Адресиев (71 кг-дин заланвал авайбурун арада) ва Мурад Магьамдеров (80 кг-дин заланвал авайбурун арада) 1-чкайриз лайихлу хьана.
Малум хьайивал, А. Адресиева Белиж поселокда тренер Омар Омарован ва М. Магьамдерова Дагъустандин Огни шегьерда Рафаэль Бекбулатован гъилик вердишвилер къачузва, чпин устадвал хкажзава. Жегьилри жуьреба-жуьре турнирра ва акъажунра гъалибвилер идалай виликни къазанмишнава. Спортдал рикIивай машгъул жезвай абурухъ гележегда мадни еке агалкьунар хьун чи мурад я.
***
Вичихъ, кIелунра хьиз, спортдани хъсан гьазурлухвал авайди субутзавай кьегьалрикай сад вичин ери-бине СтIал Сулейманан райондин Вини СтIалдилай тир Гьажибала Баламирзоев я. Ам Махачкъалада дидедиз хьана. Алай вахтунда ада меркездин 48-нумрадин мектебдин 9-классда кIелзава. Са тIимил йикъар идалай вилик Махачкъалада гъилералди кукIунай Дагъустандин Кубок патал кьиле фейи акъажунра 62 кг-дин заланвал авайбурун арада вири 4 бягьс (абурукай 2 бягьс вахт амаз акьалтIарна) устадвилелди тухвай жегьил 1-чкадиз лайихлу хьана. Гила адан вилик нубатдин акъажунриз гьазурвал акун ква.
РикIел хкин: Гьажибалади «Полёт» спортшколада Дагъустандин хкянавай командадин чIехи тренер Артур Абдуллаеван гъилик устадвал хкажзава. Ам Дагъустандин кIвенкIвечивал патал акъажунрин, Владикавказда Вирироссиядин физкультурадинни спортдин «Ислягь Кавказ» фестивалдин (адан сергьятра аваз гъилералди кукIунай кьиле фейи акъажунра) призер, клубрин арада, шегьердин кIвенкIвечивал патал кьиле фейи хейлин ачух турниррин гъалибчи я.
***
9-январдилай 16-январдалди Кеферпатан Осетия-Аланиядин меркез Владикавказда армрестлингдай СКФО-дин кIвенкIвечивал патал акъажунар кьиле фена. Ана Дагъустандин хкянавай командадик кваз иштиракай, вичин ери-бине Ахцегь райондин Гъуьгъвезрин хуьряй тир Шагьбала Шагьэмиров 90 кг-дин заланвал авайбурун арада буьруьнждин медалдиз лайихлу хьана.
РикIел хкин: Ш. Шагьэмирова армрестлингдай Дагъустандин кIвенкIвечивал 5 сеферда къазанмишнава. Ам са кьадар маса акъажунрин гъалибчини я. Спортдин сифтегьан сирер ада Ахцегьрин 2-нумрадин ДЮСШ-да чирна. Алай вахтунда ада Р. Гьамзатован тIварунихъ галай ДГПУ-дин ППО-дин факультетда кIелзава.
***
Газетда чпин агалкьунрикай чна мукьвал-мукьвал кхьизвай жегьилар гзаф ава. Къуй абурун кьадар мадни артух хьурай! Гьелбетда, абурун руьгь хкажун хъсан кар я. ИкI, ЦIийи йисан вилик Ахцегь райондин кьиле авай ксари спортда агалкьунар къазанмишнавай жегьилар ва абурун тренерар тебрикна, абуруз дипломар гана. Абурун арада машгьур тренер Эйнар Экберов, адан гъилик вердишвилер къачузвай Ренат Нурагьмедов ва Гьажи Лачинов авай.
Рагнеда Рамалданова
