Дагъустандин МВД-дин пресс-къуллугъди хабар гузвайвал, чи республикада “Яракь пулунихъ вахчун” ва “Яракь” серенжемар кьиле тухвана.
Дагъустан Республикадин гьукуматдин программадин сергьятра аваз законар чIурунин вилик пад кьунин мураддалди РД-да авай МВД-ди яракь пулунихъ вахчунин мурад агьалийри законсуздаказ хуьзвай яракьар, женгинин суьрсет ва хъиткьинардай шейэр гуьгьуьллувилелди вахкун я.
Яракь гуьгьуьллувилелди вахкай гьар са касдиз тайин кьадарда пул гузва. Месела, тапанчи вахкайдаз — 30 агъзур, автомат — 60 агъзур, гъуьрчен тфенг — 3 агъзур, гранат — 1500 манат пул гуда. Сиягьда яракьрикай ва хъиткьинардай шейэрикай пул гун патал 25 жуьре къалурнава.
Гьа икI, алатнавай кьуд вацра полициядин отделриз 8 автомат, 52 тапанчи, 86 гъуьрчен тфенг, 43 гранат ва гьакIни гъили гьазурнавай хъиткьинардай шейэрни женгинин суьрсет вахкана. Дагъустандин гьукуматди и кар патал 3 миллион манат чара авунва. Законсуздаказ хуьзвай яракь вахкун патал полициядин мукьвал алай отделдиз 02 ва мобильный 102, 112 телефонрин нумрайриз хабар гуз жеда.
РД-дин МВД-дин Уголовный розыскдин управленидин начальник Мегьамеднаби Адильханован гафаралди, законсуздаказ хуьзвай яракь жуван хатасузвал паталди вахкуниз агьалияр мажбур я. Ада мисал патал алай йисуз ЦIумада районда школадин яшда авай гададиз жагъай гранат компьютеррин залда хъиткьинай, нетижада инсанар телеф хьунал гъайи дуьшуьш рикIел хкана.
Алай йисан ноябрдин вацра Дагъустандин мулкарал кьиле тухвай “Яракь” серенжемдихъни пис нетижаяр хьанач. Адан сергьятра аваз яшайишдин кIвалера ва маса дараматра яракьар жагъурун патал кьиле тухвай серенжемрин нетижада 7 автомат, 20 тапанчи, жуьреба-жуьре уьлчмедин 3 агъзур патрум вахчуна.
РикIел хкин: алай вахтунда кардик квай Федеральный закондал асаслу яз законсуздаказ яракь, гьакI ам туькIуьрзавай кьилин паяр ва женгинин суьрсет маса къачузвай, хуьзвай, маса гузвай, санай масаниз тухузвай, гваз къекъвезвай ксар уголовный жавабдарвилиз чIугвада, гьатта 4 йисалди азадвиликай магьрумда ва 80 агъзур манатдин кьадарда аваз жерме ийида.
Законсуздаказ хуьзвай яракь гуьгьуьллувилелди вахкай ксар жавабдарвилиз чIугвадач.
«Лезги Газет»
