Алай йисан 30-ноябрдиз Тарумовский райондин ФКП-дал (Федеральный контрольно-пропускной пункт) “Неоплан 116” автобусда ахтармишунар тухудайла, ана авай пассажирдивай — Каспийск шегьердин 31 йисан яшда авай агьалидивай — 27,72 грамм гашиш жагъана. Шак физвайди кьуна ва адалай РФ-дин УК-дин 228-статьядин 2-паюнин бинедаллаз (законсуздаказ наркотикар маса къачунай, хуьнай, санай масаниз тухунай) уголовный дело къарагъарнава. Тахсиркарвал тестикь хьайитIа, адаз 3 йисалай 10 йисал къведалди кар къвезва.
* * *
Дербент шегьердин Агъасиеван тIварунихъ галай куьчедай шак физваз полициядин отделдиз хкай 39 йиса авай жегьил итимдивай, ахтармишайла, 17,78 грамм марихуана жагъана. Силисчийри ам ихьтин маса тахсиркарвилерик шерик яни — тушни ахтармишзава.
Гьа са вахтунда шак физвайдалай РФ-дин УК-дин 228-статьядин 1-паюнин бинедаллаз (наркотикар законсуз къачунай, хуьнай ва санай-масаниз тухунай) уголовный дело къарагъарнава. И статьядай судди ам 2 йисал къведалди азадвиликай магьрумун мумкин я.
* * *
Тади гьалда гел жагъурдай серенжемар тухудайла, Буйнакский райондин агьалидин кIваляй 23,80 грамм, Махачкъала шегьердин агьалидивай 14,17 грамм марихуана, 31 йиса авай махачкъалавидивай 0,371 грамм “метилэфедрон” жагъана. И “кьегьалрилай” къарагъарнавай уголовный делойрай силис тухвана куьтягь хьайила, абурни суддин вилик акъвазда.
Къайдайрал амал тавурла…
27-ноябрдиз Каспийск шегьердин 34 йиса авай агьалиди, Бабаюрт райондин Сулак поселокдин патавай фидайла, вичи гьалзавай “ВАЗ-2107” маркадин автомашин къаршидиз къвезвай рекьиз акъудна. Нетижада адан машин Къизляр шегьердин агьалидин “ВАЗ-217030” маркадин автомашинда акьуна. Залан хирер хьайи Каспийскдин агьали Махачкъаладин РОТЦ-да (республиканский ортопедо-травматологический центр) къаткурна.
* * *
28-ноябрдиз “Кавказ” федеральный шегьреда (Къарабудахкент районда) “Хендай-Грандер” автомашиндин 24 йиса авай шоферди вичин транспорт къаршидиз къвезвай рекьиз акъудна ва 61 йиса авай итимди гьалзавай “ВАЗ-21099” маркадин автомашиндихъ галукьарна. Нетижада пенсиядиз экъечIнавай итимди гьа чкадал чан гана. Залан хирер хьайи “Хендай-Грандер” автомашиндин шоферни пассажир Избербаш шегьердин центральный больницада къаткурна.
* * *
Избербаш шегьердин Магистральная ва Есенинан тIварунихъ галай куьчейрин къекъуьндал “ВАЗ-211703” маркадин автомашиндин рулдихъ галай 44 йиса авай шоферди вичин машиндик рекьелай элячIзавай 39 йиса авай итим кутуна. Нетижада ам гьа чкадал телеф хьана.
Дуьшуьшдиз килигна, материал кIватIнава…
* * *
Бабаюрт райондин Львовское хуьруьн патав “ВАЗ-2110” автомашиндин рулдихъ галай Тлярата райондин Ланда хуьруьн агьалидивай, руль хуьз тахьун себеб яз, рекьелай элячIзавай Акуша райондин Карамахи хуьруьн агьали машиндик акатна. Нетижада хасаратвилер хьайи 33 йиса авай итим Махачкъала шегьердин клинический больницадиз агакьарна.
Дуьшуьшдиз килигна, тайин къарар кьабулун патал материал кIватIнава.
Полициядин куьмекдалди
28-ноябрдиз Мегьарамдхуьруьн райондин полициядин отделдиз Къуйсунрин хуьруьн агьали арза гваз атана. Гуя малум тушир са касди вичин кIвалерин патав акъвазарнавай 80000 манатдин къимет авай “ВАЗ-2106” автомашин чуьнуьхнава.
Полициядин къуллугъчийрилай тади гьалда кьабулай серенжемрин нетижада шак физвайди тайинариз ва ам полициядин отделдиз хкиз алакьна. Ам 21 йиса авай чкадин агьали яз хьана. Ада вичин тахсир хиве кьуна. Автомашин иесидив вахкана.
Шак физвайдалай РФ-дин УК-дин 166-статьядин 1-паюнин бинедаллаз уголовный дело къарагъарнава.
Жегьил 5 йисал къведалди дустагъда ацукьун мумкин я.
«Лезги Газет»
