Заз чи макъаладин игит-ДРКБ-да (республикадин аялрин клинический больница) онкологиядин, гематологиядин ва химиотерапиядин отделенида яргъал йисара зегьмет чIуг­ваз­вай кьилин категориядин духтур, чи ватандаш —  Гегьвер   Агъарза­евна Гьажибалаевадин  кIвалахдикай суьгьбет адан инсанвилин ерийрилай башламишиз кIанзава.

Зун адахъ галаз танишарай касди адаз гьар юкъуз хийирдин дуьаяр ийизва, гьикI хьи,  уьмуьрдин мана-метлеб тир гъвечIи хва са шумуд йис идалай вилик Гегьвер Агъарзаевнади ажалдин къармахрай акъуднай. Чаз гуьгъуьнлай мадни чир хъхьайвал, Г.Гьажибалаевадиз алхишарзавай, ам рикIел алай ксар чи республикадин гьар са районда, гьар са хуьре  ава. Начагъзавай аялриз хьиз, абурун багърийрин рикIе­ризни гьар юкъуз сабур-къуват гуз, “психологвални” авунай, яргъал вахтунда и отделенида сагъар хъувун кьисмет хьайи аялризни абурун дидейриз ам багъри кас хьиз я. Азарлу аялриз сагъ хъхьунин умудлувал гун, чIуру уьзуьрди азаб гузвай гьар са аялдин тIалдикай хабар кьун Гегьвер Гьажибалаевадин гьар йикъан кIвалахдин везифайрик ква. Ам ина авай гьар са аялдив, адан багърийрив ачух ри­кIел­ди, михьи ниятривди эгечI­завай кас я. Гьавиляй ада больницадин руководстводин, отделенидин коллективдин патайни еке авторитет ва гьуьрмет къазанмишнава.

Гегьвер Агъарзаевна Мегьарамдхуьруьн райондин Чепелрин хуьре дидедиз хьана, ина чIехи хьана. Адан буба Гьажибалаев Агъарзади хуьруьн школадин директор яз 40 йисалайни артух вахтунда зегьмет чIугу­на. Ада вичин уьмуьрдин юлдаш Къизахъ галаз ругуд аял чIехи авуна, виридаз кьи­лин образование, чешнелу тербия гана. Виридалай гъвечIи­ди тир Гегьвер виридаз пара ала­ни багьа тир. Аял чIавалай тарсарал рикI алай адахъ духтур жедай мурад авай. Гьа икI, Кркарин­ юкьван школа лап хъсан къиметар аваз акьалтIа­рай руша документар Дагъустандин медицинадин институтдиз (гилан ДГМУ) вугана. Вузда кIелзавай вири 6 йисузни Г.Гьажибалаевадикай курсунин староста хьана. Анаг яру диплом къачуналди акьалтIарна. Гьатта гилани, са кьадар йисар алатайлани, ада вичиз цIийи кьилелай пеше хкядай мумкинвал хьанайтIа, вичи мад сеферда духтурвал хкядай лугьузва. Духтурвал ам патал ан­жах кIвалах туш, заз чиз, и пе­ше адан рикIин эмир, уьмуьрдин къайда я. Эхь, ахьтин инсанарни жеда, вири уьмуьрда чпин пешедиз вафалу. Къенин юкъуз ада вичин вири уьмуьр вич вафалу пешедиз бахшзава. ГьикI хьи, Гегьвер Агъарзаевнади вичихъ авай са руш — Жанна — хъсан тербия ва образование гана, уьмуьрдин шегь­редал акъудна. Алай вахтунда ам вичин хизандихъ галаз Москвада яшамиш жезва. Адан бицIи кьве шарагди Гегьвер Агъарзаевнадив чIехи дидевилин багьа гьиссер дадмишиз тазва…

Ингье чун Г.Гьажибалаевади кIвалахза­вай отделенидиз гьахьзава. Им чи республикада аялрин ракдин, ивидин азаррихъ галаз женг чIугунин рекьяй­ авай ихьтин са отделение я. Ина 15 йисал къведалди яшарин аялар сагъарзава, санлай къачурла, 60 койка ава. Отделенида тешкилнавай шартIар писбур туш: палатайра михьи, чими ва экуь я, аялриз къугъвадай чкаяр­, азарлуйрал кьил чIуг­ваз атай ксарихъ галаз ацукьдай кьилдин кIвал ва икI мад къулайвилер ава, амма ихьтин чка садан веледдизни кьисмет тахьурай!

Суьгьбетар ийиз-ийиз, чун отделенидин са шумуд палатадизни фена. Ина республикадин вири пипIерай аялар авай, абурун чIехи пай заландиз начагъбур, чIуру азар 3-4-дережайра винел акъатнавайбур тир. Гзафни-гзаф лагьайтIа,  ивидин рак (лейкоз) азарди  тади гузвайбур­.

— Къенин юкъуз  “ивидин рак” диагноз эцигнавай аялрин 100 процентдикай 80 процент аялар сагъ хъжезватIани, гьич са касни ихьтин агъур имтигьандал расалмиш тахьурай! Ихьтин четин месэла хиве гьатай вахтара хизанар чкIай, дидеяр заландиз на­чагъ аял гъилел алаз, текдиз амукьай дуьшуьшарни чал са шумудра гьалтна. Азардин фендигарвиликай яргъалди лугьунин лазимвал авач, ада кар-кардай фидалди вичикай хабар гудач,-зи рикIик квай къалабулух гьиссайда хьиз, суьгьбетзава Гегьвер Агъарзаевнади.

— ЧIуру азар сагъарун вахт яр­гъал физвайди, пулдин еке такьатар лазим къвезвайди я, гзаф диде-бубайрихъ ахьтин мумкинвилер авач. Гена, Аллагьдиз шукур, къенин юкъуз боль­ницадин кьиле авай ксарин, гьа гьисабдай яз отделенидин заведующий, медицинадин илимрин кандидат Юнусова Индира Мегьамедовнадин къай­гъударвилин нетижада чахъ лазим раб-дарман авазва. Отделенидин дуствилин коллективди кIеве авай гьар са аял къутармишуниз вири къуватар серфзава, — суьгьбет давамарзава духтурди. — Идалайни гъейри, чи гьал-агьвалдикай мергьяматлувилин фондари, кьилдин ксарини хабар кьазва, абурун куьмекдин гъилни чав агакьзава. Чпелай Аллагь рази хьурай!

Гегьвер Агъарзаевнадихъ галаз  суьгьбетар авур вахт акуна-такуна акъатна. Уьмуьрдин уькIуь-цурудакайни, пис-хъсандакайни, девирдин лишанри­кайни… адан камаллу суьгьбетри, насигьатри заз екез таъсир­навай. Адахъ галаз суьгьбет акьал­тIа­райла, заз зун руьгьдин жигьетдай мадни девлетлу хьайиди гьиссна.

Къуй виридаз куьмек гуз, хъсанвал ийиз гьазур тир чи Агъарзаевнадихъ чандин сагъвал, рикIин шадвал хьурай!

Рагнеда Рамалданова

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя