Махачкъала

Гьар йисан 12-июндиз чи уьлкведин ви­ри халкьари Россиядин югъ — государстводин кьилин сувар къейдзава.  Россиядин югъ — им азадвилин, ислягьвилин, вири ин­санар санал, дуствилелди яшамиш хьунин ва гьахълувилин сувар я. Россиядин Федерациядин государстводин аслу туширвилин гьакъиндай Декларация кьабулуни Россиядин государственностдин цIийи девирдин бине кутуна. И сувари чун чи уьл­кведин садвал ва адахъ зурба гележег жедайдахъ  инанмишарзава. Россиядин югъ  Ватандин къенин йикъан ва гележегдин патахъай вирида жавабдарвал аннамишунин жанлу лишандиз элкъвенва.

Дагъустанди Россиядин общество тупламишунихъ, уьлкведин оборона  мягькемарунихъ, гзаф миллетрин векилрикай ибарат государстводин гьуьндуьрвал дуьньядин майданда хкажунихъ элкъуьрнавай РФ-дин Президетдин рекьин тереф хуьзва.

Россиядин югъ чи уьлкведин вири регионра, шегьерра, районра къейдна. И ва­къиадиз талукьарнавай шад мярекатар Да­гъларин уьлкведин меркезда гегьеншдиз кьиле тухвана. Сувар Урусрин М.Горькийдин тIварунихъ галай госдрамтеатрдин ви­лик “Россия — чи Ватан” лишандик кваз кон­церт гунилай башламиш хьана. Анал рахай­ шегьердин кьил Муса Мусаева меркезвийриз ва мугьманриз сувар мубаракна ва шегьердин кьилин майдандални паркара суварин мярекатар давам жедайдакай хабар гана.

“Дуствилин кIвалин” вилик квай майдандал милли политикадин ва жегьилрин крарин рекьяй министерствойри тешкилнавай сувариз талукьарнавай концерт кьиле фена. Мярекатда студентри ва волонтерри иштиракна. Концерт 6752 — воинский частунин духовой оркестрди Государстводин Гимн ягъунилай башламишна ва Да­гъустандин тIвар-ван авай манидарри (Жак­лина, Алина, Гуьлдесте, Зульфия, Са­бина Тагьирова,  Абдул Мурадов ва мсб.) давамарна. Концертда иштиракай вири манидарар гьуьрметдин грамотайриз лайихлу хьана.

И вахтунда “Дуствилин кIвале” Вирироссиядин “Чун — Россиядин гражданар” акциядин лишандик кваз же­гьилрив паспортар вахкунин мярекат кьи­ле фена. Анал РД-дин Гьукуматдин Председателдин Сад лагьай заместитель Анатолий Къарибова шегьердин школайра хъсандиз кIелзавай ва 14 йис тамам хьанвай жаванрив шад гьалара Россиядин Федерациядин гражданрин паспортар вахкана. Абуруз и кар РД-дин Гьукуматдин Председателдин заместитель Ека­­терина Толстиковади ва РД-дин Кьи­лин­­­ ва Гьукуматдин Администрациядин руководителдин сад лагьай заместитель Алексей Гьасанова тебрикна.

Ленинан комсомолдин тIварунихъ галай паркуна авай Аскердин памятникдин патав “Россиядин халкьарин дуствилин парад” Вирироссиядин акциядин лишандик кваз РД-дин Халкьдин Собранидин культурадин, илимдин, жегьилрин крарай, туризмдин ва спортдин рекьяй комитетди милли политикадин рекьяй министерстводихъ галаз санал тешкилнавай шадвилин парадда 5 агъзурдав агакьна агьалийри иштиракна. Республикадин 14 райондай атанвай, милли парталар алай манийринни хореографиядин коллективар, жегьилрин общественный тешкилатрин активистар, волонтеррин дестеяр, зегьметчи коллективар кьиле РД-дин милли полити­кадин рекьяй министр Татьяна Гамалей аваз кьилин майдандихъ рекье гьатна. Параддин иштиракчийри “Россия! Дагъустан!” гафар тикрарзавай.

Майдандин кьуд пад пайдахри безетмишнава. Анал концертдин иштиракчийриз еке сегьне туькIуьрнава. Жегьилрин крарин рекьяй министерстводин къуллугъчийрини волонтеррин активистри майдандал къвезвай агьалийрив триколордин лентер вугузва. ТIебиатдин шартIари иштиракчийрин гуьгьуьлар са тIимил чIурнатIани, хизанар, аялар галаз  атанвай агьалияр хъфизвач.

Майдандал агакьайла, студентрини  школьникри  450 квадратный метр алай Россиядин Федерациядин пуд рангунин пайдах экIяна.  Сегьнедилай Дагъустандин манидарри чIехи концерт гана. Марина Алиевади, Ме­гьамед Аликберова, Рукъият Гьамзатовади, Ризван Омариева, Айшат Айсаевади ва масабуру. Лагьай манияр вирида хушдиз кьабулна.  Сятдин 9-дал кьван давам хьайи шад мярекатар майдандал фейерверкралди акьалтIарна.

Кьасумхуьр

Пакаман сятдин 9-даз райцентрадал суварин мярекатар 30-дав агакьна жегьилри “Кпул ятар” санаторийдин патавай райцентрадал алай Культурадин дворецдин патав кьван чукурунилай башламиш хьана. Ахпа “Россиядин лентер” акция кьиле фена. Кьасумхуьруьн 1-нумрадин юкьван школадин аялри чпел гьалтай инсанриз Россиядин югъ мубаракна, абуруз суварихъ галаз алакъалу тир суалар гана, тамам жавабар гайибуруз Россиядин лентер багъишна.

Сятдин 11-даз райондин администрациядин дараматдин къвалав виликан йисара районда кIвалахай урус халкьдин векилриз эцигнавай стела ачухна. Инал муниципальный райондин кьил Нариман Абдулмуталибов рахана. Ада кIватI хьанвайбуруз вири халкьдин сувар — Россиядин югъ — райадминистрациядин, райондин Собранидин депутатрин ва вичин патай мубаракна, суварин тарихдикай лагьана.

— Россияди, урус халкьдин векилри дагъвийрин, гьабурукай яз райондин агьалийрин уьмуьрдани кьетIен чка кьазва, — лагьана  Н.Абдулмуталибова. — Гьавиляй Россиядин юкъуз районда урус халкьдин векилриз — пешекарриз эцигнавай стелани ачухзава. Алатай асирдин 30-60-йисара районда образованидин, здравоохраненидин ва маса хилера цIудралди урус пешекарри гьакъисагъвилелди зегьмет чIугуна, абуру халкь савадлу авуниз чпин чирвилер, къуватар серфна, хейлинбуруз райондикай кьвед лагьай ватан хьана. Стела эцигуналди, чна урус пешекарар гьамиша рикIера авайди, абуруз акьалтзавай несилдини гьуьрметзавайди къалурзава.

Рахунрин эхирдай Н.Абдулмуталибова стела эцигай художник Агьмад Адиловаз, спонсорвилин куьмек гайи вири юлдашриз, районда кардик квай мергьяматлувилин фондунин кьиле авайбуруз сагърай лагьана.

Чпин кьадар-кьисмет райондихъ галаз ала­къалу авур урус халкьдин векилар тир Раиса Бабаевади (Кьасумхуьр) ва Зинаида Алибалаевади (КIварчагъ) стела эцигунай, районда кIвалахай урус пешекаррин тIварар эбеди яз рикIера хуьнай райондин кьил Нариман Абдулмуталибоваз, вири районэгьлийриз рикIин сидкьидай сагърай лагьана.

Инлай вири райондин Культурадин дворецдин гуьрчегдаказ безетмишнавай гьаятдиз фена. Агьалияр РД-дин искусствойрин ла­йих­лу деятель Насир Шагьмурадован регьбервилик кваз гайи чIехи концертдиз тамашна.

Белиж

Къагьриман Ибрагьимов

 12-июндиз Белиждин гимназиядин вилик квай майдандал Россиядин йикъан сувариз  талукьарнавай митинг-концерт кьиле фена.

Ам Россиядин Гимн тамамаруналди башламишна.

Белиждиз суварик иштиракиз атанвай: “Дербент район” МР-дин кьилин заместителар Сеидмегьамед Бабаев, Анвер Гьажимурадов, Фуад Шихиев, Дербент, Дагъустандин Огни шегьеррин ва Дербент райондин военный комиссар Адил Къулиев, райондин депутатрин Соб­ранидин председатель Мажмутдин Семедов. Абур Белиж поселокдин кьил Рамиз Гьабибулаева ва адан заместителри хушвилелди къаршиламишна.

Кlватl хьанвайбуруз сувар вичин ва Дербент райондин кьил М.Желилован тlва­руни­хъай С.Бабаева мубаракна: — Россиядин югъ — им чи уьлкведин ви­ри­да­лайни “жегьил” ва виридалайни кьилин сувар я. Россиядин югъ чи уьлкведин гзаф миллетрин халкьарин сад­вилин лишан я, — къейд­на ада.

— Гьуьрметлу белижвияр ва атанвай мугьманар, квез къенин югъ рикlин сидкьидай мубаракрай! — лагьана Р. Гьабибулаева. — Къенин сувар чи саналди тир тарихдин ва вири халкьарин дуствилин сувар я. Инанмиш я, гьукуматдинни муниципальный властрин органрин ва гражданвилин  обществодин къурулушрин къуватар сад авуни Россия вилик тухунин мягькем диб арадал гъида. Квез за берекатлувал, сад-садан гъавурда акьун, ислягьвал ва сагъламвал алхишзава.

Анал школайра кlелзавай аялри, “Алена” бахчадин тербиячийри ва машгьур устадри лагьай манийри, тамамарай кьуьлери сувар мадни шадди ва яргъалди рикlел аламукьдайди авуна.

Земфира Бабаева