“Йисар гьисабун са куьнизни туш: инсанар яргъалдини яшамиш жезва. Кар йисара авач, авур кIва­лахра ава”. Къадим римлуйрин шаир Овидия лагьай и келимаяр зи рикIел Махачкъалада яшамиш жезвай эминхуьруьнви (хутаргъви) Шагьпаз Асаханова ийизвай мергьяматлувилин кIвалахрикай макъала кхьиз чарни къелем гъиле кьурла хтана.

Республикадин меркезда карчивилел машгъул жезвай Ш.Асаха­нов жегьил итим я. Ада гзаф инсан­риз жуьреба-жуьре месэлаяр гьялунин, гьакIни пулунин такьатралди куьмекар гайиди я, и кар давамни ийизва.

Алатай йисуз Шагьпаза  федеральный “Кавказ” шегьредилай Эминхуьруьз 1,5 километр рехъ капитальнидаказ ремонт хъувунай. И кIвалахриз жумарт ва мерд хци 200 агъзур манат пул харжнай.

Мукьвара Шагьпаз Асаханова винидихъ тIвар кьур 1,5 километрдин рекье, 40 даях, кабель къачуна, экверин линия тухвана, гьар са даяхдал йифен вахтунда экв гудай лампаяр (“кобраяр”) эцигна. Шегьре­ рехъ гила йифен вахтунда ишигъ­­лаван хьанва. И кардай хуьруьнвийри Ш.Асахановаз баркалла лугьузва.

— Вичиз гьахълудаказ камалэгьлийрин, арифдаррин макан лугьузвай СтIал Сулейманан район гъил ачух, рикI михьи, мерд инсанралди девлетлу я, — лугьузва райондин кьил Нариман Абдулмуталибова. — Абурун куьмекдалди хуьре­ра яша­йишдин ва маса месэлаяр гьялзава. Хайи район, хуьр-кIвал патал мергьяматлувилин кIва­лахар ийизвай Шагьпаз Муслимович хьтин рухвайрилай чун кьадар авачир кьван рази я. Баркалла ва аферин чпиз!

Хазран Кьасумов