Кьиблепатан Дагъустандин багълара гьар жуьредин  емишар битмиш жезва. Майдин вацралай баш­ламишна, йисан эхирдалди­ сад-масадан гуьгъуьналлаз суфрадал къвезвай абур инсан патал гьам тIям­лу­бур, гьамни кфетлубур я.  Гьар са емишдин бегьер ви­­чин вах­тунда чав агакьун тIебиатдин шартIа­рилай, гьавайрин къулайвилерилай ва инсанди тешкилнавай гелкъуьнилай аслу я.

Йисан сифте паюна чразвай “майдин” сортунин пIи­нийриз емишрин “чархачияр” лугьузва. Исяда чи багъла­ра 2-3 сортунин пIинияр чран­вай вахт я. Базаррин, туьквенрин дезгейрални абур булвилелди аквазва. Ви­та­минралди девлетлу и емишрал иллаки аялрин рикI ала.

Сулейман-Стальский районда  10 сортунин пIинияр бит­миш жезва. ЦIи абурун бегьерарни писзавач: тарарин­ хи­лер акIаж хьанва. КIан­завайди абур  атIудай гъилер я.

Райсудин Набиев