РД-дин  региондин капитальный ремонтдин Фондунай хабар гайивал, 2020-йис алукьдалди Дагъустанди  гзаф квартирайрикай ибарат кIвалер бинедилай  ремонт авун патал 500 миллион манатдилай артух пул рекье твада.

Капремонтдиз талукь яз тестикьарнавай пландин бинедаллаз, 2017-2019-йисара республикада гзаф квартирайрикай ибарат 117 кIвал ремонт ийидайвал я.

“Яшайишдин кIвалерин фондунин пландик кутунвай кIвалерин умуми майдан 390,5 агъзур квадратный метрдиз барабар я. Программа уьмуьрдиз куьчуьрмишунин нетижада, алукьзавай пуд йисан вахтунда тахминан  17 агъзур агьалидин яшайишдин кIвалерин  шар­тIар авайдалай хъсанарда”, — хабар гузва фондунай.

“Фондуниз финансар къвезвай аслу чешме кIвалерин хсусиятчийри варз-вацра гузвай пул  я. 2016- йисуз республикада 1 кв.метрдилай гузвай взнос 5,4  манатдиз барабар тир. 2017-йисузни  и кьадар алатай йисан дережада хуьдайвал я.

Капитальный ремонтдин прог­раммадин сергьятра аваз тамамарзавай кIвалахрик акатзава: кIвалин къенепатан инженерный къурулушар, къав,  винел пад ремонт авун, гьисабдиз къачудай приборар эци­гун­.

Идалай вилик хабар гайивал, 2015-йисуз республикада гзаф квартирайрикай ибарат 30, 2016-йисуз 32 кIвал ремонтнай.

Жасмина Саидова