Спортдин акъажунар галачиз “Шарвили” эпосдин суварин мярекатар фикирдиз гъиз жедач. ГьикI хьи, Шарвили вичин халкьдин къайгъуда авай, милли адетрал рикI алай, халкьдин аслу туширвал патал женг чIугур (чапхунчи ваъ, ватандин аслу туширвал хвейи) пагьливан тир. Аниз килигна, 2000-йисалай инихъ гьар сеферда “Шарвили” эпосдин суваррин мярекатрин программадик спортдин милли жуьрейрай акъажунарни ква. И акъажунра, адет хьанвайвал, Кьиблепатан Дагъустандин районрин дестейри ва кьилдин спортсменри иштиракзава.
И сеферда “Шарвили” эпосдин суварин сергьятра аваз спортдин акъажунар командайрин арада кьиле фена. Ахцегь, Рутул, Докъузпара, Мегьарамдхуьруьн, Сулейман-Стальский, Кьурагь районрин дестейри, Дербент, Дагъустандин Огни ва Каспийск шегьеррай атанвай спортсменри путар хкажунай (толчок 32 кг), къван гадарунай (9 кг), армспортдай (абсолютка), цIил чIугунай (5 кас) къуватар алцумна.
Итижлудаказ кьиле фейи и акъажунра 1-чка Кьурагь районди кьуна, 2-чка Ахцегь ва Мегьарамдхуьруьн районрин командайри пайна.
Акъажунрин нетижайрай гъалибчийриз Дагъустан Республикадин Халкьдин Собранидин депутат Рафик Асланбегован патай премияр ва грамотаяр гана.
Дагъви Шериф
