Алатай вацран эхиримжи йикъара Смоленскда 35 йисалай гзаф яшар хьанвайбурун арада азаддиз кьуршахар кьунай Россиядин ачух чемпионат кьиле фена. Дагъустандин ирид пагьливан ана гъалибчияр хьана ватандиз хтана.
Дуьньядин чемпионатдиз спортсменар хкягъунин макьсаддалди тешкилай и акъажунра чи уьлкведин регионрай ва Къазахстандай, Литвадай, Латвиядай 120 касди иштиракна. Абурукай къад кас дагъустанвияр тир.
Ахцегь райондай фенвай Къариб Ашуралиева чемпионатда нубатдин сеферда 1-чка кьуна. Дагъустанви гъалибчийрин арада Къизилюртдай Мегьамед Бадрудинов, ЦIунтIи райондай Мегьамед Кьурамегьамедов, Леваша райондай Нариман Сулейманов, Избербашдай Гьажимурад Таймазов, Казбек райондай Алисултан Качалаев ва Рауп Амиралиев ава. Абуру гила Болгарияда кьиле фидай дуьньядин чемпионатда иштиракда.
* * *
Хасавюртдин Олимпиададин резервдин училищедин кьвед лагьай курсуна кIелзавай Екатерина Вербинади 18 йис тамам тахьанвай рушарин арада азаддиз кьуршахар кьунай Боснияда ва Герцеговинада кьиле фейи Европадин акъажунра гъалибвал къазанмишна.
Дагъви Шериф
