“Лезги газетдин” алатай йисан 51-52-нумрайра Лезгийрин госмуздрамтеатрдикай кхьенвай материалар кIелайла, зи рикIел а театр Ахцегьа авай вахтар хтана.

Чи хизан Ахцегьа яшамиш хьана ва зани 1948-йисал къведалди ана мектебда кIелайди я. Аял чIава­лай театрдал, кинодал, мехъеррални межлисрал зи рикI алайди тир. А театрдин директор рагьметлу Хуьруьг Тагьирни  хьайиди я. Гьа вахтара ва дяведилай  гуь­гъуьнин йисара Ахцегьа театрди къалурай вири тамашайриз зун килигайди я. Гьа йисарин артистрикай зи рикIел алама: С.Велиханов, А.Агъабалаев, Э.Эмиржанов, С.Мирзоев ва са кьадар масабур, виридан тIва­рар зи рикIел аламач.

Дишегьлийрикайни зи рикIел алама Х.Девлетханова, К.Рамазанова, Шемси-Жагьан, Света Асланбегова, Дурия Рагьимова ва икI мад. Къухмазов Мурадхан дяве куьтягь хьайила хтайди я, ам Лезги театрда кIвалахиз башламиш хъувур, субай дишегьли Шемси-Жагьанал эвленмиш хьайи вахт заз лап хъсандиз чида. Театрдин коллектив а вахтара дагъдин хуьрериз къведай абурун зегьметдин гьахъ колхозди гудай.

Дербентдиз куьч хъхьайлани абурун коллектив чи хуьруьз гьам тамашаяр, гьам концертар гваз къведай. Чи халкьди гьамиша абур гьуьрметдивди кьабулдай.

Къухмазова Зерифадин 60 йисан юбилейдин материал газетдиз акъатна. Зани лишанлу и югъ Зерифа Мурадхановадиз тебрикзава, гележегдин уьмуьрда чан­дин сагъвал, рикIин хушбахтвал ва искусстводин чIе­хи дережайриз акъатун Аллагьдивай тIалабзава. Адаз зун чидачтIани, заз адан къаш-къамат, адан диде-бубадин (рагьмет хьурай чпиз) сегьнедин  образар, гьам Ахцегьа театрда, гьам хуьруьз атайла ва гьакIни телевизордай акуна чида. Халкьдин патай гьуьрмет авай диде-бубадихъ гьахьтин къимет къазанмишзавай руш хьунухьни еке бахтлувал я. Ваз ва ви балайриз­ни бахтар гурай,  гьар са карда квехъ чIехи агалкьу­нар хьурай, чан руш.

Тагъи Абдурагьманов

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя