Йикъан месэла — алаф

Гад алукьнава. Им хуьруьн ма­йи­шатдин карханаяр, лежбервилинни фермервилин майишатар, арендаторар патал чуьлдин кIва­лах­рин къизгъин вахтарикай сад я. Уьзуьмлухрани багълара, никIе­ра­ни салара агротехникадин серен­жемар кьиле тухунихъ галаз санал алай вахтунда хуьруьн майишатдин зегьметчийри, агьалийри общественный ва хсуси мал-къара патал алафар гьазурзава.

— Алафар гьазурунин кIвалахар районда хъсан еришар ва тешкиллувал аваз кьиле физва, — лугьузва­ Сулейман-Стальский райондин хуьруьн майишатдин ва суьрсетдин управленидин начальник Мегьамедзагьид Бабаева. — И кардал бес кьадар рабочияр ва техника желбнава. КIвалахарни план-графикда къалурнавайвал тухузва.

Лагьана кIанда, эхиримжи йисара районда, хуьруьн майишатдин амай хилер хьиз, малдарвални вилик физва, гьам мал-къарадин, гьам гьасилзавай малдарвилин про­дукциядин кьадарни артух жезва. И кардиз инвесторри некIединни малдарвилин фермайрин комплексар эцигуни ва районда федеральный программаярни проектар кардик кутуни екедаказ куьмек гузва.

Гьелбетда, малдарвал вилик ту­хун общественный ва хсуси мал-къарадиз алафдин мягькем база яратмишунилай гзаф аслу я. И кар аннамишнавай карханайра, майишатра алатай йисуз 26 000 тонн векьер, 5500 тонн самар гьазурнай.

М.Бабаева къейд авурвал, тIе­би­атдин шартIариз килигайла, алай йис хуьрерин зегьметчияр патал къулайдиз атана, мукьвал-мукьвал къвайи марфари чIурухъан чкай­­риз, уьруьшриз, багълариз хъсан векь акъудна, ида шазан­далай артух алафар гьазурдай мумкинвал гуда.

Малум хьайивал, ДаркIуш-Къазмайрин, ЦIийи Макьарин, Эминхуьруьн, Герейханован, КIвар­чагъ­рин  ва  маса  хуьрерин  поселенийра векьер ягъунин, абур туькера тунин ва мал-къаради кьуьд акъуддай чкайрал саламат авунин кIва­лахар хъсан тешкиллувал аваз кьи­ле физва.

Чун Эминхуьруьн мулкунал ве­кьер язавай са шумуд участокдизни фена. Векьер гьам дергесралди, гьамни тракторрихъ акалнавай махсус алатралдини язава. Алимерден Алимерданова, Фахми Кьа­сумова, Багъир Демирова, Надир Яхьяева, Садилагь Селимова, Миламудин Мегьамедова чпин багъ­ларай, люцерна цанвай участокрай векьер яна, туькера туна акьалтIарнава.

Районда мал-къара патал алафар гьазурунин кIвалахар давам жезва.

Хазран Кьасумов