Мукьвара Московский областдин Пушкино шегьерда каратэдин кёкусинкай жуьредай (стилдай) и райондин кьилин Кубок патал регионрин арада акъажунар кьиле фена.

      Кьурагь райондин администрациядин пресс-къуллугъди хабар гузвайвал, турнирдин кьилин тешкилатчи чи ватанэгьли, Кьурагь райондин Къумухрин хуьруьн ДЮСШ-да вердишвилер къачур Ислам Рустамов я. Ам чIулав чIулунин сагьиб, спортдин мастер, дуьньядин чемпионатдин призер, кьве сеферда – Россиядин, пуд сеферда – Дагъустандинни Къазахстандин чемпион я.
    Акъажунра Дагъустандин, Армениядин, Нижний-Новгороддин, Калининграддин, Ивановодин, Костромадин, Москвадин (5 команда), Подольскдин командайри иштиракна. Гъалибвал патал, санлай къачурла, 306 спортсменди бягьсер кьиле тухвана.

    Шад жедай кар ам я хьи, акъажунра Кьурагь райондин ДЮСШ-да тренер Заир Рамазанован гъилик вердишвилер къачузвай Халид СултIановани Салигь Исмаилова 2-чкаяр кьуна. Кьакьан дагъларин къужахда чIехи жезвай жаванриз каратэдин ихьтин жуьредай вердишвилер къачудай мумкинвилер тешкилун анжах тебрикиз жедай кар я. Уьлкведин дережада аваз кьиле фейи акъажунра абуру кIвенкIвечи чкаяр кьун мадни чIехи шадвалдай делил я. Аферин жаванриз!

«Лезги газет»