18-майдиз Сулейман-Стальский районда, Дагъустандин халкьдин шаир Стlал Сулейманан шииратдин йикъарин сергьятда аваз, шадвилин мярекатар кьиле фена. XX асирдин Гомеран цlийиз эхциг хъувунвай музей ачухуниз талукьарнавай мярекатда РД-дин Кьил Рамазан Абдулатипован уьмуьрдин юлдаш Инна Васильевнади, Сулейман Керимован уьмуьрдин юлдаш Фируза Назимовнади, РД-дин культурадин министр Зарема Бутаевади, Кьиблепатан Дагъустанда республикадин Кьилин патай тамам ихтияр ганвай векил Энрик Муслимова,РД-дин печатдин ва информациядин министр Рашид Акавова, РД-дин культурадин ирс хуьнин рекьяй агенстводин регьбер Заур Къагьриманова, РД-дин писателрин Союздин председатель Мегьамед Агьмедова, РД-дин Халкьдин Собранидин депутат Гьамидуллагь Мегьамедова, Сулейман-Стальский, Мегьарамдхуьруьн, Кьурагь, Ахцегь районрин кьилери, общественный ва политический деятелри, писателри ва хейлин масабуру иштиракна.

Рахайбуру вирида Стlал Сулейманан тlвар эбеди яз халкьдин рикlера амукьдайди, адан яратмишунрин ирс чун паталди чlехи девлет тирди къейдна.

Са шумуд сятда давам хьайи шадвилер Лезгийрин Стlал Сулейманан тlварунихъ галай госмуздрамтеатрдин артистри, Дагъустандин эстрададин гъетери мадни гурлу авуна.

Чlехи шаирдин музей ачухаруниз талукь мярекатра Дагъустандин халкьдин шаирри, тlвар-ван авай алимри, Стlал Сулейманан шиират ахтармишзавай алай аямдин литературоведри иштиракнавайтlа, мадни хъсан жедай.

Музей ачухаруниз талукьарнавай мярекатрикай гегьеншдиз ‘Лезги газетдин’ къведай нумрадай кlелиз жеда.

‘Лезги Газет’