ДАГЪУСТАН — ХАЛКЬАРИН САДВАЛ
Ирид йис жезва чна Дагъустандин халкьарин садвилин югъ къейд ийиз. Дугъриданни, им республикада яшамиш жезвай гьар са халкьдин ва миллетдин векил патал суварриз элкъвезвай югъ я. Сад-садав мадни гьуьрметдивди, дуствилелди эгечIзавай, стха культурайрин, искусстводин чешмейрал гьейранвалзавай, абуруз дуьзгуьн къимет гузвай югъ я.
ЦIинин суварин кьетIенвал ам я хьи, Садвилин югъ вири республикади чи къадим Дербент шегьерда ва Нарын къеледа къейдзава. Гьа са вахтунда гьа и зурба мярекатдалди Дербент шегьердин 2000 йисан юбилейдиз талукь яз тухвай мярекатарни акьалтIарзава. Аниз вири районрай фольклордин ансамблар, гьевескарар, искусстводин устадар, милли театррин коллективар, эстрададин “гъетер” ва гзаф кьадарда мугьманар кIватI жеда.
Садвилин югъ Россиядин халкьарин адетдин культурайрин центрайрин “Зи Дагъустан — зи Россия” тIвар алай форум-фестиваль яз кьиле фида. Ана “Ирсдарар” сектордини иштиракзава.
Дербент шегьердин “Азадвал” майдандал кIватI хьайи тамашачийриз “Дагъустандин булахар” лишандик кваз чи халкьарин майданар, симинин пагьливанар, фольклордин, хореографиядин, музыкадин ва маса коллективри иштиракзавай гала-концертар, халкьдин яратмишдай коллективрин “Халкьарин дуствал” хоровод аквада. Культурадин ва искусстводин и межлисда Ахцегь, Агъул, Хив, Сулейман-Стальский, Мегьарамдхуьруьн, Дербент, Лак, Леваша, Унцукул, Хунзах, Къизляр, Къаякент, Буйнакский районрин ва саки вири шегьеррин 32 коллективди чпин алакьунар къалурда.
Форум-фестивалдин сергьятра аваз муниципальный са бязи районри кар алай проектар уьмуьрдиз кечирмишдайла халкьдин майишатдин вири хилера къазанмишнавай агалкьунар, «Инсанвилин капитал» проектдин нетижаяр раижда. Гьа са вахтунда Дербент шегьерда и юкъуз республикадилай къеце яшамиш жезвай ватанэгьлийрин форум, “Ипекдин рехъ цивилизацияр сад-садал туьш жезвай чка я. Россиядин халкьарин адетдин культураяр вилик финин ва хуьнин месэлаяр” тIвар алаз конференцияни кьиле фида.
Пагьливанрин гьунарар къалуриз симерал Дагъустандин Огни шегьердин циркинин искусстводин, Къули райондин Цовкра-1 школайрин устадар, Мегьарамдхуьруьн райондин “Гьунар” десте хкаж жеда.
Нянихъ Нарын-къеледа “Зи халкьдин маниярни кьуьлер” ва “Жегьилрин сесер” гала-концертар жеда.
Хийир Эмиров
