«Къалгъанар» кIватIалдай
Чир хьана
Са чIехидан докладдилай гуьгъуьниз
Собранидиз атай Мугъул ацукьна.
Яб гайила амайбурун рахунриз,
Эхирдай ам мягьтел хьана амукьна.
Патав гвай кьве касдивай жузуна:
— Вучиз вири Алидикай рахазва,
Ада гьина, вуч чIуру кар авуна?
КIвалахда ам кьегьал яз заз аквазва.
— Пис кар авач, чна рикIел хкидай,
Хъсан хьана кьегьал яз ваз акуна.
Са кар хьанва: сифте рахай чIехида
Ам писдаказ критика авуна…
Сада-садаз
Начальникди, ажугълу яз,
Работникдиз лагьана:
— КIвалахдин вахтунда заз вун
Ресторанда датIана
Гьар юкъуз гьа нез-хъваз акваз
Гьикьван хьуй мад? — лагьана.
Жаваб гана адаз эхир
Работникди кичIе тушир:
— Аквачир зун ресторанра
ЖезвачиртIа гьар юкъуз вун,
Мугьман жемир къенлай кьулухъ,
КIан ятIа ваз мад зун такун…
Гьа икI буьркьуьда буьркьуьдаз
«Бугьда» лугьуз ван хьана чаз.
Фитнечидиз
Санал тIуьр фу ракъурна фад рикIелай,
РикI михьи кас кьацIурда на, фитнечи.
Алудиз кIанз дугъри кас дуьз рекьелай,
Рекье цацар акIурда на, фитнечи.
Садра кьванни михьи рикIив рахадач,
Герек юкъуз бакарада акьадач,
Чинал садран гьич инсандин кеф хадач,
Кьулухъай туьд атIуда на, фитнечи.
Са кардикай уьтери ван хьанамаз,
Фитне-буьгьтен къундармишда вуна ваз,
Вилералди акурди хьиз, физ рахаз,
Михьиз хуьруьз чукIурда на, фитнечи.
Фитнечияр чаз виридаз такIанда,
Вун виляйни аватда ви хизанда,
Гагь-гагь инсан гьахъсуз туна дуванда,
КIвачин кьилел кьурурда на, фитнечи.
Ви гафунихъ къуват жеда сифтедай,
Са шумуд кас беябурда гьафтеда.
Авур фитне ашкара хьай вядеда
Ялтахвални къалурда на, фитнечи.
Хцин патав
Аялдивай шифоньердин
Гуьзгуь хана, галукьна,
И кар акур адан диде
Гьайиф чIугваз амукьна.
— Мад вучда кьван, чан акъатрай,
Гуьзгуь хадай адет я,
Хутаз тада цIийи гуьзгуь,
Пуд виш манат къимет я.
Алай пекер кьацIурнаваз,
Хтайла хва куьчедай,
Дидеди, чин чIур тавуна,
Милайимдиз лагьанай:
— Аял я ам, вучин адаз,
Парталар я кьацIайди,
Завай жедач гьич кефи хаз,
Тек са гьам я авайди.
Къуншид багъдай и аялди
Чуьнуьхдайла емишар,
Кьуна, гъана дидед патав:
— Ая тIун хва вердишар!..
— Къахчу завай хьайи зиян,
Зи аялдик хуькуьрмир,
Дуьшуьшдай им хьайи кар я,
Къундармаяр туькIуьрмир.
ИкI, дидеди авай са хва
Хвена даим харудиз,
Къе агакьна чIехи я ам,
ЧIар атана чурудиз.
Пабни гъана, чара хьанва,
Килигзавач дидедиз,
Инсанвилин намус ада
Квадарнава эбеди.
Ихьтин касдихъ жедач дустар,
Жедач уьмуьр, кIанивал,
Уьмуьрлух яз амач адаз
Дидед патай хайивал.
Гьазур я чун вири санал
Адаз нифрет авуниз…
Кстахдиз хуьн себеб хьана,
Дидедиз яб тагуниз.
«Лезги газетдин» 2024-йисан 22-нумрадай.
