Бес вучиз?

 

Садалайни аслу тушиз,

Гьахълу зегьмет чIугвазва за.

Гьич садазни буржлу тушиз,

Гьалаллу фу незава за.

Бес вучиз куьн пехил я зал?

Тарашнач за, къакъуднач за,

ЧIуру рекьер къалурнач за.

Гьатна кIеве, унач арза,

Чирна жуваз гуьнени къуза.

Бес вучиз куьн пехил я зал?

Гьич саданни кефи ханач,

Къекъвей рекьер гьяркьуь хьанач,

Дадмиш тавур майва хьанач,

Зи зегьмет я — дарвал ганач.

Бес вучиз куьн пехил я зал?

Табни гьилле терг авуна,

Дуьз рекьикай даях кьуна.

Фитнейризни дурум гана,

Душмандизни чан лагьана.

Рагъ хьайитIан михьи цава,

Гагь-гагь кьилел харни къвана.

Бес квел пехил хьанва куьн зи?

«Лезги газетдин» 2024-йисан 21-нумрадай.