Зерифа Кьасумова 1956-йисуз КцIар райондин СтIуррин хуьре дидедиз хьана. Ана юкьван мектебда, Дагъустандин госуниверситетдин филологиядин факультетда кIелна. Къуба райондин Къырмызы поселокда муаллимвиле кIвалахзава, азербайжан ва лезги чIаларал шиирар кхьизва. Зерифадин “Шушадин суза” тIвар алай ктаб акъатнава. Адан эсерар Дагъустандин, Азербайжандин газетра, журналра чап хьанва.
Чун цIаярин уьлкведай я
Лезги Няметаз
Хьран къене кудайди туш чи фирчин,
Чун цIаярин уьлкведай я, цIаярин!
Къайибуруз ахъайдач рак, гудач чин,
Чун цIаярин уьлкведай я, цIаярин!
ЦIай авачир халкьдин къула цIай кудай,
Яр-дустуниз чимивилин пай гудай.
Душманариз, регьим тийиз, цIай гудай,
Чун цIаярин уьлкведай я, цIаярин!
Гъил агъада авай элдин гъил кьадай,
Чи накьварал яргъи авур гъил хадай,
Хаин касдин рикI атIудай, кьил хадай,
Чун цIаярин уьлкведай я, цIаярин!
Агьузарар, вилин накъвар пай гъимир,
Хуш манияр, авазар гъваш, вай гъимир,
Чун саврухар такIанбур я, къай гъимир,
Чун цIаярин уьлкведай я, цIаярин!
«Лезги газетдин» 2019-йисан 27-нумрадай
_______________________________________________________________
Ямир вуна заз терсина рандаяр
КIарар ханва ви кIарасдин гурарин
Хкаждай кьван чIехи, залан чантаяр.
Зун гъавурда авазва ви крарин,
Ямир вуна заз терсина рандаяр.
Гад, зул фена, ваз акурди нуькIер я,
Къуьл пайдайла, хьанач ви тIвар кьадайди.
КIвалахдайла, кIвенкIвечияр — цуьквер я,
Вичелай цIуд къат залан пар кьадайди.
Къуш я лугьуз, сирнавзавай цавара
ЧIагъарини чеб лекьерив кьада сад.
Кисунихъни хийир гала чкадал,
«Къиб рахадач, фида лугьуз сивиз яд».
Къуьлер, мухар гатадайди дингер я,
Ви кьил гьикьван и дингера кукIварин?
Аквазвайди ваз чешнеяр, рангар я,
Сан низ чида зи гамунин квакварин?
КIарар ханва ви кIарасдин гурарин
Хкаждай кьван чIехи, залан чантаяр.
Зун гъавурда авазва ви крарин,
Ямир вуна заз терсина рандаяр.
Масмардин тан чуьнуьхардай кIутади
За эхирда эцигнавай нукьтIади
Чи суьгьбетар куьтягь хьайди чирзава.
Масмардин тан чуьнуьхардай кIутадин,
Хкатнавай кьили крар чIурзава.
Сирнавзава гьуьлуьн серин къатара
Гъилер-кIвачер зурзазавай къужади.
Танкар, тупар акъатнава, гадара,
Жув яда гьа чIуру, буьркьуь ружади.
Базардава бугъаз хварар, ябуяр,
Къимет фена яргъа фидай шиверин.
Тарифариз гутаз ава бубуяр,
Сиве гьатна пад галачир сиверин.
РикI алахъна дегишариз къанунар,
Кими тийиз кьили гайи къарардиз.
Таб я лугьуз и дуьнядин акунар,
КIвалахзава рикIи кьилин зарардиз.
За эхирда эцигнавай нукьтIади
Чи суьгьбетар куьтягь хьайди чирзава.
Масмардин тан чуьнуьхардай кIутадин
Хкатнавай кьили крар чIурзава.
Рубаияр
Угъридин мал чуьнуьхдай туш угъриди,
Садран иви чуьхуьдай туш ивиди.
Чараданди зазни вазни я гьарам,
Чуьнуьхай мал я зиди туш, я види.
* * *
Жеда фу ваъ, чан гудайбур етимдиз,
КIукI вичи нез, кIан гудайбур итимдиз.
Кьил сагъзамаз эцигайтIа хъсан я
Пуд лагьай кIвал, кьве паб авай итимди.
* * *
Руг акъатда шивер фейи рекьерай,
Акъудмир на гапур нагьахъ къакъарай.
КIеви сивиз ядни, гарни фидай туш,
Ахъа сив я ацIудайди тIветIерай.
* * *
ВацIун эхир кар зверун я гьуьлерал,
ВиртIедин чIиж элкъведай хьиз цуькверал.
Архайин хьухь, вуна цавуз вегьейди,
Са мус ятIан хквервал я гъилерал.
* * *
На жувалай чIехи касдиз эмирна,
Вучиз чIурна бес ваз гайи эмир на?
«Вач, бармак гъваш» лагьайла ваз чIехида,
Бармак алай кьил атIана гъимир на.
«Лезги газетдин» 2019-йисан 51-нумрадай
