КцIар райондин СтIуррин хуьре гилани Далагьрин тухум ама, ана и тIвар алай магьлени ава. Ада лезги ва фарс чIаларал теснифзавай. Са девирдин инсанар яз, СтIур Далагьни машгьур Низами Генжеви дуствилин алакъайрани авай, шаиррин арада адет тирвал, абур чеб чпихъ галаз шиирралди гьуьжетрани гьатдай. Низами кьейила, кхьей шиирда Далагьа лугьузва:

Ильясан руьгь хъфена,

Хъиляй дагълар ифена.

Кьудкъад йисни тахьана,

Дуст кьена ГанцIах пата…

Гъуцарни пелеш ятIа?

СтIур Далагь магъулрин чапхунчийрихъ галаз кьиле фейи дявейрин девирда яшамиш хьана, женгера иштиракай ада кхьизва:

Акурд я заз канвай хуьрер,

АцIайд я зи видив вилер.

Гилани зи атIанвач агь…

Ада шаирдин руьгь хкаждай гафуналди хайи чил хуьнизни эвер гана:

Чка (а)тайла кьурд я яракь,

Мягькемвилиз хьайд я чан ракь.

КукIарайд я ягъи михьиз,

Къирмишайд я лап чIутер хьиз.

«Зи руьгьдин муг хьайтIан цава, / Зи гьахъ рекьел куьн алама», — жегьил несилдихъ умудлу яз, лагьанай СтIур Далагьа вичин «Эхир гаф» шиирда.

«Лезги газетдин» 2025-йисан 4-нумрадай