Шагьризат Маллаева (Хив район)

Чи духтурар

Гуьлмегьамедаз

 

Йифиз, юкъуз зегьмет чIугваз,

Начагъбурухъ жеда вун.

Герек хьана эверайла,

КIвалеризни къведа вун.

 

Зи муаллимдин гада я вун,

Рагьметар хьуй кьейибуруз.

Дережадиз зурба я вун,

Вакай куьмек хьайибуруз.

 

Кпул цикни больницада

КIвалах ийиз галатдач.

Четин хьана атайдалай,

Сагъ тахьанмаз, алатдач…

* * *

Ажимурадаз

Зулун йиф тир гзаф къайи.

Руфуна тIал гьатна къати,

Атайла зун “скорыйдал”,

Вири акьалтна са кIвачел.

 

Жегьил духтур Ажимурад,

Ваз Аллагьди гурай къуват.

Тади куьмек гана на заз,

ТIал атIана зи гьанамаз.

 

Ви чирвилер хьурай артух.

КIвалахда вун къалур зирек

Хъуьрез къваздай, чинни ачух,

На виридаз гузва куьмек.

 

Зун тIал аваз атай бере,

Дар хьанвай заз михьиз дуьне.

Чирна за ви ери-бине,

Ваз чIал кхьиз кьуна гъиле.

 

Ви гъиликай хьана куьмек,

Яшлу диде хьана зирек.

Ихьтин гада хана, гайи,

Ви дидедиз хьурай  женнет!

 

Ваз и чIалар кхьей шаир,

Ам са яшлу диде я, хва.

Вун хвейидаз хьуй аферин,

ЧIилихъар зи бине я,хва.

 

* * *

Аминатаз, Хив райбольницадин

аялрин отделенидин заведующийдиз 

 

Вун са кас я дагълух хуьруьз акъатай,

Ви кIвалахдихъ лап рикIивай агатай.

Аяларив ширин-ширин рахадай,

Милайим рикI авай кас я Аминат.

 

Вахт-вахтунда аквада вун кIвалахдал,

Къекъведа вун кьил чилеваз дамахдал.

Йиф-югъ талгьуз, зегьмет чIугваз аялрал,

Халис духтур хьанва вун чаз, Аминат.

 

Начагъ аял сагъ жедалд вун алатдач,

Гьич садрани вун аб(у)рукай галатдач,

Лугьудач на вахт авач, мажал авач,

Сабур ганва ваз Аллагьди, Аминат.

 

Аминат, вун дамах хьанва райондин,

Халис духтур хьанва лугьуз аялрин,

Гъавурда кьаз рикIяй фейи хиялрин,

Духтур я вун чи рикI алай, Аминат!

«Лезги газетдин» 2020-йисан 32-нумрадай.

____________________________________________________

Духтур Сурая

 

Сифте сефер акурла вун вилериз,

Зун килигиз амукьнай ви гъилериз,

Къурбанд хьурай вун къекъвезвай чилериз,

Зи лезги руш, женнетдин къуш Сурая!

 

Зи лезги руш лезги чIалал рахада,

Беневшад ранг костюм алаз къекъведа,

Шад жеда зун, вун акур гьар легьзеда,

Зи лезги руш, женнетдин къуш Сурая!

 

Заз духтурар гзаф хьана уьмуьрда­,

Гьич садани тунач хьи зун гъавурда­,

Вун акурла, гьатнава зун суьгьуьрда­,

Зи лезги руш, женнетдин къуш Сурая!

 

Чи дагъларин жейран я вун синевай,

ТуькIуьрай ви гьар са метлеб рикIевай,

Диде я вун ви балайрин кIвалевай,

Зи лезги руш, женнетдин къуш Сурая!

 

Начагъдан рикI шад жеда вун акурла,

Куьмек гана, вуна сагъар авурла,

Къекъвезва вахъ мад сеферда хтайла,

Зи лезги руш, женнетдин къуш Сурая!

 

Ваз и чIалар багъишда за рикIивай,

Бегьем фагьум жезамач зи кьиливай,

Гьич хъвер яваш тахьурай ви сивикай,

Зи лезги руш, женнетдин къуш Сурая!

«Лезги газетдин» 2021-йисан 9-нумрадай.

_____________________________________________________

Ви гъил — дарман

 

Гьар пакамахъ кIвалахал вун аквада,

Начагъ касдихъ хушвилелди рахада,

Капельница лап регьятдиз кутада,

Ви гъилерихъ гьунар ава, Умуят!

 

Кьурагь патан дагъларава хайи хуьр,

Чирвилериз Умуят я дерин гьуьл.

Рапар ягъиз, вуч кьезил я а ви гъил,

Духтурвилиз лайих я вун, Умуят!

 

Кьурагь дагъдин марал хьиз вун аквада,

Вун дидедин лезги чIалал рахада.

Пехилвилер тавурай вал чарада,

Аллагьди ваз гурай сагъ чан, Умуят!

 

Ери-бине чизвач заз ви хъсандиз,

Бегенмиш я заз вун халис  инсан хьиз,

Бахт, берекат хьуй вун авай хизандиз,

Балайрикай рикI динж хьуй ви, Умуят!

 

Гьар сеферда хтай чIавуз патав ви,

АкI жезва заз, хайи руш акур хьиз зи.

Дагъларавай хуьрер я ватанар чи,

Чун са патан инсанар я, Умуят!

 

Зун шаир я, ваз и чIалар кхьидай,

Начагъ я зун, затIни амач жагъидай.

Ваз аферин лугьузва за рикIивай,

Ви гъиликай хьуй заз дарман, Умуят!

«Лезги газетдин» 2021-йисан 38-нумрадай.